ისრაელის პრეზიდენტი ისააკ ჰერცოგი Flydubai-ის რეისის 4 მგზავრს, მათ შორის ქართული წარმოშობის ისრაელელ ექიმს, შოთა მუსაევს, სამოქალაქო გმირობისთვის უმაღლეს საპრეზიდენტო ჯილდოზე წარადგენს. მუსაევმა და კიდევ სამმა მგზავრმა ჰაერში დატრიალებული ტრაგედია თავიდან აიცილეს და ბორტზე მყოფი 174 ადამიანის სიცოცხლე იხსნეს.
ინციდენტი გუშინ, 30 სექტემბერს, დუბაი-თელ-ავივის რეისზე (FZ1073) მოხდა. ფრენის დროს მეორე პილოტმა მოულოდნელად კაპიტან სმიტ მაჩჰარს დანა დაარტყა, რის გამოც თვითმფრინავმა სიმაღლე მკვეთრად დაკარგა და მართვის გარეშე დარჩენის საფრთხე შეიქმნა. მძიმედ დაჭრილმა კაპიტანმა კაბინის კარის გაღება მოასწრო, რის შემდეგაც ვითარებაში მგზავრები ჩაერთვნენ.
პრეზიდენტის ადმინისტრაციის ინფორმაციით, სამი მგზავრი — იანივ ჰაიუნი, ცვიკა მანესი და ასაფ რაჯუანი — კაბინაში შეიჭრა და შეიარაღებული თავდამსხმელი გაანეიტრალა, რა დროსაც ჰაიუნმა თვითმფრინავის შტურვალიც კი გადაიბარა. სწორედ ამ კრიტიკულ მომენტში, ექიმმა შოთა მუსაევმა მძიმედ დაჭრილ კაპიტანს სიცოცხლის შემანარჩუნებელი სამედიცინო დახმარება აღმოუჩინა. მან პილოტის მდგომარეობის სტაბილიზება შეძლო, სანამ თვითმფრინავი საუდის არაბეთში, ტაბუკის აეროპორტში საგანგებო დაშვებას განახორციელებდა.
„მგზავრებისა და ეკიპაჟის სწრაფმა მოქმედებამ დიდი კატასტროფა თავიდან აიცილა”, — განაცხადა ისააკ ჰერცოგმა. პრეზიდენტი ოთხივე მგზავრს პირადად ესაუბრა და მათ უკიდურესი საფრთხის მომენტში გამოვლენილი სიმამაცისა და მაღალი სამოქალაქო პასუხისმგებლობისთვის მადლობა გადაუხადა.
ცნობისთვის, სამოქალაქო გმირობისთვის პრეზიდენტის ჯილდო ისრაელის უმაღლესი სამოქალაქო ორდენია, რომელიც 2023 წლის 7 ოქტომბრის მოვლენების შემდეგ დაარსდა.
