საქართველოში სამეცნიერო კვლევებსა და ექსპერიმენტულ დამუშავებაზე გაწეული დანახარჯი საგრძნობლად გაიზარდა. საქართველოს სტატისტიკის ეროვნული სამსახურის ბოლო მონაცემებით, გასულ წელს ამ სფეროს დაფინანსებამ 282 მილიონი ლარი შეადგინა, რაც წინა — 2024 წლის მაჩვენებელს 16%-ით აღემატება.
კვლევით პროცესებში სულ 69 სხვადასხვა დაწესებულება იყო ჩართული, რომლებშიც ჯამურად 16 552 ადამიანი მუშაობდა. აქედან უშუალოდ აკადემიურ და სამეცნიერო კვლევებს 14 390 მკვლევარი ახორციელებდა.
როგორია მკვლევართა გენდერული ბალანსი და აკადემიური კვალიფიკაცია?
გენდერული გადანაწილება: სფეროში ქალების წილი ჭარბობს — მკვლევართა 55.1% ქალია, ხოლო 44.9% — კაცი.
აკადემიური ხარისხი: კვლევით სექტორში მკვლევართა უმრავლესობას მაღალი აკადემიური ხარისხი აქვს. მკვლევართა თითქმის ორ მესამედს (67.5%) დოქტორის (ან მასთან გათანაბრებული) ხარისხი აქვს. მაგისტრები მკვლევართა 29.8%-ს შეადგენენ, ხოლო ბაკალავრები ან მასთან გათანაბრებულები — 2.7%-ს.
რომელია წამყვანი სამეცნიერო მიმართულებები?
სამეცნიერო მიმართულებებს შორის ლიდერობს სოციალური მეცნიერებები, სადაც 3 250 მკვლევარი მუშაობს (საერთო რაოდენობის 22.6%). მცირედით ჩამორჩება ჰუმანიტარული მიმართულება (22.1%), მესამე ადგილზე კი საბუნებისმეტყველო მეცნიერებებია 18.9%-ით.
წყარო: geostat
