კონგოს დემოკრატიულ რესპუბლიკასა და უგანდაში ებოლას იშვიათი და საშიში სახეობა, „ბუნდიბუგიო“ ვრცელდება. ბოლო მონაცემებით, რეგიონში უკვე დაფიქსირდა დაავადების 336 საეჭვო შემთხვევა, რომელთაგან 88 ფატალურად დასრულდა.
ამ დროისათვის ებოლას ამ კონკრეტული შტამის წინააღმდეგ ოფიციალურად დამტკიცებული არც ვაქცინა არსებობს და არც მედიკამენტი. სიტუაციის სიმწვავის გამო, ჯანმრთელობის მსოფლიო ორგანიზაცია (WHO) რეგიონში ექსპერიმენტული პრეპარატების კლინიკური კვლევების სასწრაფოდ დაწყებას გეგმავს.
მკურნალობის ერთ-ერთ მთავარ იმედად ანტივირუსული მედიკამენტი „რემდესივირი“ მიიჩნევა. ეს წამალი მეცნიერებმა მანამდე ებოლას სხვა სახეობისა და კოვიდ-პანდემიის დროსაც გამოსცადეს, თუმცა მისი ეფექტურობა მაშინ საკმაოდ ზომიერი იყო.
მეორე და უფრო იმედისმომცემი პრეპარატია „MBP134“, რომელიც ორი სხვადასხვა ანტისხეულის უნიკალური ნაზავია. ლაბორატორიულმა ცდებმა აჩვენა, რომ ამ წამალმა ბუნდიბუგიოს ვირუსით ინფიცირებული და მძიმე სიმპტომების მქონე ცხოველების თითქმის სრული გამოჯანმრთელება უზრუნველყო.
რაც შეეხება პრევენციას, ვაქცინების მხრივ არჩევანი ბევრად უფრო შეზღუდულია. აფრიკის დაავადებათა კონტროლის ცენტრი ახლა განიხილავს, გამოსცადოს თუ არა მიმდინარე ეპიდაფეთქებისას მსოფლიოში ერთადერთი ლიცენზირებული ებოლას ვაქცინა „Ervebo“.
ეს ვაქცინა უმაღლეს ეფექტურობას აჩვენებს ებოლას ყველაზე გავრცელებული სახეობის წინააღმდეგ, თუმცა უცნობია, რამდენად დაიცავს ის ადამიანს მიმდინარე შტამისგან. მეცნიერების ვარაუდით, მისი ეფექტურობა ამ შემთხვევაში, შესაძლოა, მხოლოდ 50% აღმოჩნდეს.
საერთაშორისო სამედიცინო გუნდები ამჟამად ადგილობრივი მთავრობებისგან ოფიციალურ ნებართვას ელიან. კვლევების დაწყება საშუალებას მისცემს სამყაროს, ზუსტად დაადგინოს, რომელი ექსპერიმენტული მეთოდი მუშაობს რეალურად ადამიანებში ებოლას ამ იშვიათი სახეობის დასამარცხებლად.
წყარო: Nature
