ჩინეთის იუნანის პროვინციაში, ივნისიდან აგვისტომდე პერიოდში, კლინიკები უჩვეულო სიმპტომების მქონე პაციენტებით ივსება. ეს ადამიანები ამტკიცებენ, რომ ხედავენ პატარა, ელფის მსგავს ფიგურებს, რომლებიც კედლებზე დაცოცავენ.
ამ ფენომენის მიზეზი სოკო Lanmaoa asiatica-ა, რომელიც არასწორი მომზადების შემთხვევაში სპეციფიკურ ფსიქოდელიურ ეფექტს იწვევს. ფსიქიატრიაში ამ მდგომარეობას „ლილიპუტურ ჰალუცინაციებს“ უწოდებენ, რაც პატარა ადამიანების, ცხოველების ან ფანტასტიკური არსებების ხილვას გულისხმობს.
ამჟამად, იუტას უნივერსიტეტის (University of Utah) მეცნიერები ამ სოკოს გენომსა და მის ქიმიურ შემადგენლობას შეისწავლიან. კვლევის მთავარი მიზანი იმ უცნობი ნაერთის იდენტიფიცირებაა, რომელიც ასეთ უცნაურ და თანმიმდევრულ ვიზუალურ ეფექტებს იწვევს. მეცნიერები მიიჩნევენ, რომ ამ მოლეკულის აღმოჩენა და შესწავლა ადამიანის ტვინის მუშაობის შესახებ ფუნდამენტურად ახალ ცოდნას მოგვცემს.
განსაკუთრებით საინტერესოა ჰალუცინაციების უპრეცედენტო ერთგვაროვნება. სხვა ცნობილი ფსიქოდელიური ნივთიერებებისგან (მაგალითად, ფსილოციბინი) განსხვავებით, რომლებიც ყოველი ადამიანისთვის ინდივიდუალურ და ცვალებად ხილვებს წარმოშობს, L.asiatica სხვადასხვა კულტურასა და გეოგრაფიულ არეალში (ჩინეთი, ფილიპინები, პაპუა-ახალი გვინეა) იდენტურ ვიზუალურ ჰალუცინაციებს იწვევს: ყველა ადამიანი პატარა კაცუნებს ხედავს.
ეს ფაქტი მიუთითებს იმაზე, რომ სოკოში არსებული უცნობი ნაერთი ტვინის კონკრეტულ, სპეციალიზებულ უბნებზე მიზანმიმართულად ზემოქმედებს. თუ მეცნიერები დაადგენენ, ზუსტად როგორ ახერხებს ეს ნივთიერება ასეთი სტაბილური ვიზუალური კონსტრუქციების ფორმირებას, ეს მათ საშუალებას მისცემს, უკეთ გაიგონ, როგორ აღიქვამს და ამუშავებს ადამიანის ტვინი გამოსახულებებსა და გარემო სამყაროს.
ამ ეტაპზე დადგენილია, რომ აღნიშნული ეფექტი ფსილოციბინთან კავშირში არ არის და სრულიად სხვა ქიმიურ ბუნებას ატარებს. ამასთანავე, სოკოს მიერ გამოწვეული მდგომარეობა უჩვეულოდ ხანგრძლივია და ერთიდან სამ დღემდე გრძელდება.
მეცნიერთა ჯგუფი ვარაუდობს, რომ ამ იდუმალი მოლეკულის იდენტიფიცირება ნეირომეცნიერებას ახალ ეტაპზე გადაიყვანს, რაც ტვინის სიღრმისეული შესწავლისა და, შესაძლოა, ფსიქიკური აშლილობების მკურნალობის ახალ გზებსაც დაუდებს საფუძველს.
წყარო: BBC
