მეცნიერებმა ხელოვნურ ინტელექტზე დაფუძნებული ახალი მეთოდი შეიმუშავეს, რომელიც ბავშვებში თავის ტვინის სიმსივნის დიაგნოსტიკას მნიშვნელოვნად ამარტივებს.
ტექნოლოგია ეყრდნობა „თხევად ბიოფსიას“, ეს მიდგომა სიმსივნის შესახებ ინფორმაციის მიღებას მხოლოდ ორგანიზმში არსებული სითხეების საშუალებით უზრუნველყოფს.
ინოვაციური სისტემა, სახელწოდებით M-PACT, ზურგის ტვინის სითხეში სიმსივნური უჯრედების მიერ დატოვებულ უმცირეს გენეტიკურ კვალს ეძებს. ხელოვნური ინტელექტი სპეციალური ალგორითმით დნმ-ის იმ ქიმიურ ცვლილებებს აანალიზებს, რომლებიც თითოეული სიმსივნისთვის ინდივიდუალური „თითის ანაბეჭდივით“ მოქმედებს.
ამ მეთოდით, AI-ს სიმსივნის ტიპისა და მისი აგრესიულობის უზუსტესად ამოცნობა ისეთ შემთხვევებშიც კი შეუძლია, როდესაც ნიმუშში დნმ-ის რაოდენობა ძალიან მცირეა. ეს აქამდე მეცნიერებისთვის გადაულახავი ბარიერი იყო.
M-PACT-ის ეფექტურობა უკვე დადასტურდა მასშტაბური კვლევებით, სადაც მეთოდმა სიმსივნეების 92%-ის ზუსტი იდენტიფიცირება შეძლო. საგულისხმოა, რომ ტექნოლოგია მკურნალობის მთელ პროცესს აკონტროლებს. ხელოვნურ ინტელექტს დამატებითი ქირურგიული ჩარევის გარეშე შეუძლია დაადგინოს როგორ რეაგირებს სიმსივნე თერაპიაზე.
გარდა ამისა, სისტემა აანალიზებს სიმსივნის გარშემო არსებულ „მიკრო გარემოს“ და იმ ჯანსაღი უჯრედების მდგომარეობას, რომლებიც დაავადებასთან ბრძოლაში არიან ჩართულნი. ეს რევოლუციური მიღწევა საფუძველს ჩაუყრის პერსონალიზებული მედიცინის განვითარებას.
მიუხედავად იმისა, რომ ამ ეტაპზე მეთოდი ბავშვთა ნეიროონკოლოგიაზეა ფოკუსირებული, მეცნიერები დარწმუნებულნი არიან, რომ ინოვაციის გამოყენება მომავალში სხვა მყარი სიმსივნეებისა და სისხლის დაავადებების დიაგნოსტიკაშიც გახდება შესაძლებელი.
პროექტი საერთაშორისო თანამშრომლობის შედეგია, რომელშიც წმინდა იუდას ჰოსპიტალთან ერთად გერმანელი და სხვა წამყვანი ქვეყნების მეცნიერები მონაწილეობდნენ.
წყარო: Nature
