2026 წლის 1 ოქტომბერს იტალიის ქალაქ მილანში, ევროპის დიაბეტის შემსწავლელი ასოციაციის (EASD) 62-ე ყოველწლიურ კონგრესზე, თბილისის სამედიცინო აკადემიის ასოცირებული პროფესორი და მკვლევარი ნატალია ასათიანი სამეცნიერო მოხსენებით წარდგება.
ზეპირი მოხსენების მთავარი თემა პირველი ტიპის დიაბეტის (T1D) მქონე ქალებში ორსულობის შედეგების კვლევაა. უფრო კონკრეტულად, ნაშრომი აფასებს, თუ რა კავშირი აქვს ორსულობის პირველ და მეორე ტრიმესტრში გამოვლენილ მიკროალბუმინურიას (შარდში ცილის მცირე რაოდენობით გამოყოფას) ორსულობის შემდგომ განვითარებასა და საბოლოო გამოსავლებთან.
ნატალია ასათიანი მედიცინის დოქტორია და საერთაშორისო კონგრესზე საქართველოს დიაბეტის კვლევის ეროვნული ცენტრის სახელით გამოვა. მსგავსი მასშტაბის სამეცნიერო პლატფორმაზე ქართული კვლევის წარდგენა ადგილობრივი მედიცინის, განსაკუთრებით კი ენდოკრინოლოგიისა და მეანობის გადაკვეთაზე არსებული მიღწევების საერთაშორისო აღიარებას უსვამს ხაზს.
ცნობისთვის, ევროპის დიაბეტის შემსწავლელი ასოციაციის ყოველწლიური შეხვედრა მსოფლიოში ერთ-ერთი ყველაზე ავტორიტეტული და მასშტაბური სამეცნიერო ღონისძიებაა, რომელიც დიაბეტის მკურნალობასა და კვლევაში არსებულ უახლეს მიგნებებს ეთმობა. წლევანდელი, 62-ე კონგრესი მილანში 28 სექტემბრიდან 2 ოქტომბრის ჩათვლით იმართება და მსოფლიოს წამყვან სპეციალისტებს აერთიანებს.
