28 სექტემბერს მსოფლიო ცოფთან ბრძოლის საერთაშორისო დღეს (World Rabies Day) აღნიშნავს. ეს თარიღი ცნობილი ფრანგი მიკრობიოლოგის, ლუი პასტერის, გარდაცვალების დღეს უკავშირდება, რომელმაც კოლეგებთან ერთად ცოფის საწინააღმდეგო პირველი ვაქცინა შექმნა. ცოფი ერთ-ერთი ყველაზე საშიში ზოონოზური ვირუსული ინფექციაა, რომელიც ცენტრალურ ნერვულ სისტემას აზიანებს და კლინიკური სიმპტომების გამოვლენის შემდეგ თითქმის 100%-იანი ლეტალობით ხასიათდება.
ჯანდაცვის მსოფლიო ორგანიზაციის (WHO) შეფასებით, მიუხედავად იმისა, რომ დაავადება სრულად პრევენცირებადია, ის ყოველწლიურად ათიათასობით ადამიანის, უმეტესად ბავშვების, გარდაცვალებას იწვევს. ინფექციის გადაცემის მთავარი წყარო შინაური და გარეული ძუძუმწოვრები, უპირატესად კი დაინფიცირებული ძაღლებია. ეპიდემიოლოგები ხაზგასმით აღნიშნავენ, რომ დაავადების აღმოსაფხვრელად გადამწყვეტი მნიშვნელობა ცხოველთა მასობრივ ვაქცინაციას, მოსახლეობის ინფორმირებულობასა და ცხოველის მიერ დაკბენის ან დაკაწვრის შემთხვევაში პოსტექსპოზიციური პროფილაქტიკის (ვაქცინაციის კურსის) დაუყოვნებლივ დაწყებას ენიჭება.
