“აღნიშნული საკითხი მრგვალ მაგიდასთან, სპეციალისტთა შორის ერთხელ და სამუდამოდ გადაწყვეტას საჭიროებს, რადგან ექიმის ფუნქციების დაკნინებასა და მის საქმიანობაში ჩარევას უკიდურესად უარყოფითი შედეგები მოჰყვება — როგორც პრაგმატული კუთხით, ისე პაციენტზე ორიენტირებული მიდგომის თვალსაზრისით.
საკითხი საკმაოდ კომპლექსურ ხასიათს ატარებს. ახალი რეგულაციებით, ფსიქოტროპული მედიკამენტების განმეორებით გამოწერა ორ კვირაში ერთხელ უნდა მოხდეს. ერთი მხრივ, სრულიად გასაგებ რეალობას წარმოადგენს ის, რომ მარტივი ბენზოდიაზეპინებიც კი მიჩვევას იწვევს, თუმცა მეორე მხრივ, პაციენტებს განსხვავებული დიაგნოზები და საჭიროებები აქვთ. საქმე მხოლოდ შფოთვასა და შფოთვით-დეპრესიულ აშლილობას არ ეხება, როდესაც ანტიდეპრესანტისა და ტრანკვილიზატორის კომბინაცია ინიშნება.
პაციენტის მდგომარეობაზე რეაგირება და მკურნალობის სტრატეგია ინდივიდუალურ მიდგომას მოითხოვს. ყოველი გადაწყვეტილება კონკრეტულ სამედიცინო შემთხვევას ეფუძნება. იმ შემთხვევაში, თუ პაციენტს კლინიკაში გამოცხადება არ შეუძლია, რეგულაციამ ბინაზე მედიკამენტის ოფიციალურად გამოწერის შესაძლებლობა უნდა გაითვალისწინოს.
სწორედ ეს საკანონმდებლო ხარვეზები საჭიროებს მოწესრიგებას, წინააღმდეგ შემთხვევაში მსგავსი უსიამოვნო პრეცედენტები მრავლად დაფიქსირდება. მოქმედი რეგულაციები აშკარა მოუქნელობას ავლენს. აუცილებლობას წარმოადგენს ექსპერტებისა და დარგის მცოდნე სპეციალისტების ერთობლივი მუშაობა, რათა მივაღწიოთ კონსენსუსს, რომელიც პაციენტს საჭირო ოპტიმალური სერვისით უზრუნველყოფს და ამ შესაძლებლობის ადამიანის ჯანმრთელობის საზიანოდ თუ ნარკოლოგიური მიზნებისთვის გამოყენებას გამორიცხავს.
საკითხი ნამდვილად სიღრმისეულ განხილვას ითხოვს. აქ ზედმეტი აჟიოტაჟი კი არა, პროფესიონალური მსჯელობა და საქმიანი შეხვედრები გვესაჭიროება. ამ რეგულაციების გამო ბევრი კეთილსინდისიერი ექიმი დაზარალდა, ზოგს ლიცენზიაც კი დროებით შეუჩერდა. არც შეშინებული ექიმი გამოადგება საქმეს და ვერც ის განუკითხაობა მოიტანს სარგებელს, რასაც მედიკამენტებისა თუ სხვა საშუალებების უკანონო და უმიზნო მოხმარება იწვევს.
ის, რაც შეერთებულ შტატებში ხდება, ჩვენს რეალობას არ ასახავს. ნარკოტიკული შემცველობის პრეპარატებთან მიმართებით საქართველოში მკაცრი რეგულაციები დიდი ხანია მოქმედებს და ეს შედარებით ნაკლებ პრობლემას ქმნის. თუმცა ფსიქოტროპული მედიკამენტებიც სრული სიზუსტით, სწორად და გამართულად უნდა ინიშნებოდეს. მოკლედ რომ ვთქვათ, ჩემი პოზიცია სწორედ ამაში მდგომარეობს“, — ამბობს „მედსკრიპტუმთან“ ინტერვიუში გიორგი ჩახავა, ნევროლოგი.
