ჰარვარდის საზოგადოებრივი ჯანმრთელობის სკოლისა და მასაჩუსეტსის ზოგადი ჰოსპიტალის (Mass General Brigham) მეცნიერებმა მასშტაბური კვლევის შედეგად დაადგინეს, რომ კოფეინიანი ყავისა და ჩაის ზომიერი მოხმარება მნიშვნელოვნად დემენციის რისკს ამცირებს და კოგნიტურ დაქვეითებას ანელებს.
კვლევა, რომელიც 40 წელზე მეტხანს გრძელდებოდა და 130,000-ზე მეტ ადამიანს მოიცავდა, ჟურნალ JAMA-ში გამოქვეყნდა.
კვლევის შედეგები
კვლევამ აჩვენა, რომ კოფეინიანი ყავის რეგულარული მოხმარება დემენციის პრევენციასთან პირდაპირ კავშირშია. იმ პირებს შორის, რომლებიც ამ სასმელს ყოველდღიურად მიირთმევდნენ, დაავადების განვითარების რისკი 18%-ით უფრო დაბალი აღმოჩნდა მათთან შედარებით, ვინც ყავას საერთოდ არ სვამდა ან ძალიან იშვიათად მოიხმარდა.
მეცნიერებმა კოგნიტური ფუნქციების, მეხსიერებისა და ყურადღების შენარჩუნებისთვის კონკრეტული ოპტიმალური დოზირებაც გამოყვეს. კვლევის მიხედვით, საუკეთესო შედეგები დაფიქსირდა დღეში 2-3 ფინჯანი კოფეინიანი ყავის ან 1-2 ფინჯანი ჩაის მოხმარებისას. საინტერესოა, რომ კოფეინის უფრო მაღალ დოზებსაც კი არ გამოუვლენია უარყოფითი ეფექტი ტვინზე, პირიქით, მათ ანალოგიური ნეიროპროტექტორული თვისებები აჩვენეს.
განსაკუთრებით საყურადღებოა კოფეინის, როგორც აქტიური ნივთიერების, როლი ამ პროცესში. ვინაიდან დეკოფეინიზებულ ყავას (კოფეინის გარეშე) მსგავსი დამცავი ეფექტი არ უჩვენებია, მეცნიერები ვარაუდობენ, რომ სწორედ კოფეინია ის მთავარი ნეიროპროტექტორული ფაქტორი, რომელიც ამცირებს ტვინში ანთებით პროცესებსა და უჯრედულ დაზიანებას. ის ადენოზინის რეცეპტორებს ბლოკავს, რაც ნეირონების გადარჩენასა და ტვინის ფუნქციურ სტაბილურობას ხელს უწყობს.
ყავასა და ჩაიში შემავალი ბიოაქტიური ინგრედიენტები, როგორიცაა, მაგალითად, პოლიფენოლები და კოფეინი, ტვინის ჯანმრთელობის შენარჩუნებას ხანგრძლივ პერსპექტივაში ხელს უწყობს.
წყარო: JAMA
