ხელოვნური ინტელექტის ჩატბოტების ხშირი მომხმარებლები უფრო მეტად იჯერებენ ანტივაქსერულ მითებს, ვიდრე ისინი, ვინც ჯანმრთელობის შესახებ ინფორმაციის მისაღებად ამ ტექნოლოგიებს არ იყენებს. ჯანდაცვის კვლევითი ორგანიზაციის, KFF-ის მიერ აშშ-ში ჩატარებულმა ახალმა სოციოლოგიურმა გამოკითხვამ აჩვენა, რომ სამედიცინო რჩევებისთვის AI ინსტრუმენტების გამოყენება პირდაპირ კორელაციაშია ვაქცინების შესახებ მცდარი შეხედულებების გავრცელებასთან.
კვლევამ, რომელშიც 2 480-მა ამერიკელმა მიიღო მონაწილეობა, აჩვენა, რომ ჩატბოტების ხშირ მომხმარებლებს შორის გაცილებით მაღალია იმ მითების რწმენა, თითქოს ვაქცინები აუტიზმს იწვევს ან წითელას საწინააღმდეგო აცრა უფრო სახიფათოა, ვიდრე თავად ვირუსი. აღსანიშნავია, რომ ეს კავშირი უცვლელი დარჩა ისეთი ფაქტორების გათვალისწინების შემდეგაც, როგორიცაა ასაკი, რასა, განათლება და პოლიტიკური კუთვნილება.
სტატისტიკური მონაცემების მიხედვით, იმ ზრდასრულთა 35%, რომლებიც ხელოვნურ ინტელექტს ჯანმრთელობის საკითხებზე კვირაში ერთხელ მაინც მიმართავენ, მიიჩნევს, რომ წითელა-წითურა-ყბაყურას (MMR) ვაქცინასა და ბავშვებში აუტიზმის განვითარებას შორის კავშირი „ნამდვილად ან სავარაუდოდ სიმართლეა“. შედარებისთვის, მათ შორის, ვინც AI-ს სამედიცინო მიზნებისთვის საერთოდ არ იყენებს, ამ მითის მხოლოდ 20%-ს სჯერა. ანალოგიური ტენდენცია ფიქსირდება mRNA ვაქცინებთან დაკავშირებითაც: ხშირი მომხმარებლების 29% შეცდომით მიიჩნევს, რომ ამ ტიპის ვაქცინებს ადამიანის დნმ-ის შეცვლა შეუძლია, მაშინ როდესაც ტექნოლოგიის არმომხმარებლებში ეს მაჩვენებელი 20%-ია.
მკვლევრები აღნიშნავენ, რომ სამედიცინო რჩევებისთვის ხელოვნური ინტელექტის გამოყენება იმავე ტენდენციას აგრძელებს, რაც წლების განმავლობაში საძიებო სისტემების შემთხვევაში ფიქსირდებოდა, თუმცა ჩატბოტების მიერ გენერირებული დეზინფორმაციის დონე და მიკერძოება მნიშვნელოვნად არის დამოკიდებული კონკრეტულ მოდელებზე, მათ სატრენინგო მონაცემებსა და დეველოპერი კომპანიების პოლიტიკაზე. KFF-ის გამოკითხვამ ასევე გამოკვეთა დემოგრაფიული სხვაობა: შედარებით დაბალი შემოსავლისა და განათლების მქონე ჯგუფები ჯანმრთელობის შესახებ ინფორმაციას უფრო ხშირად სოციალურ ქსელებში ეძებენ, ხოლო მაღალი შემოსავლისა და უმაღლესი განათლების მქონე პირები უპირატესობას ხელოვნური ინტელექტის ინსტრუმენტებს ანიჭებენ.
წყარო: The Guardian
