მანჰაიმის ფსიქიკური ჯანმრთელობის ცენტრალურმა ინსტიტუტმა (CIMH) მასშტაბური კვლევა ჩაატარა, რომელმაც სიგარეტის მოხმარებასა და დეპრესიის განვითარების რისკს შორის პირდაპირი კავშირი კიდევ ერთხელ დაადასტურა.
ჟურნალ BMC Public Health-ში გამოქვეყნებული ნაშრომი გერმანიის ისტორიაში ერთ-ერთ ყველაზე მასშტაბურ სამეცნიერო კვლევას წარმოადგენს, რომლის ფარგლებშიც მეცნიერებმა 173,890 ადამიანის მონაცემები შეისწავლეს.
კვლევის შედეგები
კვლევამ აჩვენა, რომ დეპრესია მწეველებსა და ყოფილ მწეველებში ბევრად უფრო ხშირია, ვიდრე იმ ადამიანებში, ვისაც არასდროს მოუწევია. ამ პროცესზე დაკვირვებისას მეცნიერებმა რამდენიმე მნიშვნელოვანი კანონზომიერება გამოყვეს.
ერთ-ერთი მთავარი მიგნება ის არის, რომ მოწეული ღერების რაოდენობა დეპრესიის სიმპტომების სიმძიმეს პირდაპირ განსაზღვრავს. ასევე მნიშვნელოვან როლს ასაკობრივი ფაქტორიც თამაშობს. მოწევასა და ფსიქიკურ ჯანმრთელობას შორის არსებული უარყოფითი კავშირი ყველაზე მკაფიოდ საშუალო ასაკის, კერძოდ 40-დან 59 წლამდე, ჯგუფში დაფიქსირდა.
კვლევამ აჩვენა, რომ თამბაქოს მოხმარების დაწყების ასაკი დეპრესიის გამოვლენის დროს პირდაპირ განსაზღვრავს. რაც უფრო ადრე იწყებს ადამიანი მოწევას, მით უფრო ადრე უვითარდება პირველი დეპრესიული ეპიზოდი.
მოწევისთვის თავის დანებება დეპრესიის რისკს ამცირებს
მეცნიერებმა ხაზგასმით აღნიშნეს, რომ თამბაქოსთვის თავის დანებებას ფსიქიკაზე რეალური დადებითი ეფექტი აქვს. მონაცემების მიხედვით, რაც უფრო მეტი დრო გადის ბოლო მოწევიდან, დეპრესიის ხელახალი გამოვლენის რისკი მით უფრო მცირდება.
მიუხედავად იმისა, რომ კვლევა პირდაპირ მიზეზ-შედეგობრივ კავშირს ჯერჯერობით არ ამტკიცებს, მეცნიერები მომავალში გენეტიკური და ვიზუალიზაციური მონაცემების გამოყენებას გეგმავენ, რათა ზუსტად განსაზღვრონ, თუ რა მექანიზმები უდევს საფუძვლად ამ დამოკიდებულებას.
წყარო: BMC
