OncoDaily-ის თანადამფუძნებელი და მთავარი რედაქტორი, გევორგ თამამიანი 2026 წლის Global Health Catalyst-ის გამორჩეული ლიდერის ჯილდოს (Distinguished Leader Award) მფლობელი გახდა. დაჯილდოების ოფიციალური ცერემონია ჰარვარდის უნივერსიტეტისა და მასაჩუსეტსის ტექნოლოგიური ინსტიტუტის (MIT) ერთობლივი სამიტის ფარგლებში, 18-21 სექტემბერს გაიმართება.
Global Health Catalyst-ის ჯილდო 2015 წლიდან გაიცემა და იმ ლიდერებს გადაეცემა, რომელთა იდეები და ინიციატივები კიბოს მკურნალობისა და ეკონომიკური განვითარების მიმართულებით ადგილობრივ თუ გლობალურ დონეზე მნიშვნელოვან ცვლილებებს ქმნის. სხვადასხვა დროს ეს ჯილდო გადაეცათ ნობელის პრემიის ლაურეატ ჰაროლდ ვარმუსს, ოქსფორდის უნივერსიტეტის პროფესორ დეივიდ კერის, The Lancet Oncology-ის მთავარ რედაქტორ დეივიდ კოლინჯრიჯსა და რუანდის პირველ ლედის, ჟანეტ კაგამეს.
გევორგ თამამიანი გლობალურ ონკოლოგიაში საერთაშორისო თანამშრომლობისა და ჯანდაცვის სისტემების გაძლიერების კუთხით მუშაობს. იგი ორ მსხვილ პედიატრიულ ონკოლოგიურ საზოგადოებას ხელმძღვანელობს — ბავშვთა ონკოლოგიის საერთაშორისო საზოგადოების (SIOP) აზიის ფილიალსა და POEM ჯგუფს, რომელიც 28 ქვეყნისა და 110 კიბოს ცენტრის პროფესიონალებს აერთიანებს. გარდა ამისა, თამამიანი St. Jude-ის ევროპის რეგიონული მრჩეველთა კომიტეტის თანათავმჯდომარეა და 13 ევროპულ ქვეყანაში სამედიცინო პოლიტიკის ფორმირებაში მონაწილეობს.
მისი კარიერული გზა კლინიკურ პრაქტიკას, კვლევით საქმიანობასა და ინსტიტუციურ მშენებლობას აერთიანებს. 32 წლის ასაკში თამამიანმა სომხეთის ბავშვთა კიბოსა და სისხლის დაავადებების ცენტრი ჩაიბარა, სადაც დანაწევრებული სამედიცინო სერვისები ერთ ეროვნულ ინსტიტუციად აქცია. ახალი მენეჯმენტის პირობებში ცენტრში პაციენტთა გადარჩენის მაჩვენებელი 80%-მდე გაიზარდა. მანვე დააფუძნა ეროვნული საქველმოქმედო ფონდი City of Smile, რომელიც სომხეთში მცხოვრებ ყველა ბავშვსა და ახალგაზრდას დიაგნოსტიკისა და მკურნალობის სრული დაფინანსებით უზრუნველყოფს.
ამჟამად ექიმი თამამიანი ერევნის სახელმწიფო სამედიცინო უნივერსიტეტის ჰემატოლოგიისა და პედიატრიული ონკოლოგიის მიმართულების ხელმძღვანელი, ასევე კიბოსა და კრიზისების ინსტიტუტის (Institute of Cancer and Crisis) დირექტორთა საბჭოს თავმჯდომარეა. მას ევროპის, ჩრდილოეთ ამერიკისა და აზიის შვიდ სხვადასხვა ქვეყანაში აქვს განათლება მიღებული. აღსანიშნავია, რომ Global Health Catalyst-ის ახალი ჯილდო მის მრავალრიცხოვან საერთაშორისო აღიარებათა სიას ემატება, რომელიც ამერიკის კლინიკური ონკოლოგიის საზოგადოების (ASCO) და კიბოს კონტროლის საერთაშორისო კავშირის (UICC) პრესტიჟულ პრიზებსაც მოიცავს.
წყარო: OncoDaily
