თბილისის თავისუფალი უნივერსიტეტის ფიზიკის სკოლის კურსდამთავრებული, ქეთევან დანელია სამეცნიერო-კვლევით საქმიანობას აშშ-ში განაგრძობს. ემორის უნივერსიტეტში ფიზიკის დოქტორის ხარისხის მიღების შემდეგ, ქართველი მეცნიერი კარიერას ჰარვარდის სამედიცინო სკოლაში (Harvard Medical School) მკვლევრის პოზიციაზე აგრძელებს. მისი ინტერესის სფერო ფიზიკის მეთოდების გამოყენებით ადამიანის ჯანმრთელობისა და დაავადებების შესწავლაა.
ჰარვარდის სამედიცინო სკოლის კვლევით სისტემაში გადასვლამდე ქეთევანმა მაგისტრატურა და დოქტორანტურა ემორის უნივერსიტეტში, თეორიული ბიოფიზიკის მიმართულებით დაასრულა.
მისი სადოქტორო კვლევა ცოცხალ ორგანიზმებში ინფორმაციის დამუშავების სიზუსტის ფუნდამენტურ ფიზიკურ საზღვრებს ეხებოდა. ნაშრომში განსაკუთრებული ყურადღება ეთმობოდა ემბრიონის განვითარების ურთულეს პროცესს, რომლის დროსაც, ხმაურიანი და ქაოტური მოლეკულური სიგნალების მიუხედავად, საოცარი სიზუსტით ყალიბდება რთული ორგანიზმი.
დისერტაციაში მეცნიერმა აჩვენა, თუ როგორ შეუძლიათ ცოცხალ სისტემებს მოლეკულურ სიგნალებში არსებული კანონზომიერებების გამოყენებით ინფორმაციის უფრო ზუსტად დამუშავება. მიღებული შედეგები სამეცნიერო საზოგადოებას ეხმარება უკეთ გაიგოს, თუ როგორ აღწევენ ბიოლოგიური სისტემები ასეთ მაღალ საიმედოობას მაშინ, როდესაც მათ საფუძვლად ბუნებით სრულიად შემთხვევითი მოლეკულური პროცესები უდევს.
ახლა უკვე როგორც ჰარვარდის სამედიცინო სკოლის მკვლევარი, ქეთევანი თეორიულ და მექანისტურ მოდელირებას თანამედროვე მანქანური სწავლების (AI) მეთოდებთან გააერთიანებს. ამ ინოვაციური მიდგომის მთავარი მიზანი დაავადებების განვითარების მექანიზმების უკეთ გაგებაა. ფიზიკისა და მანქანური სწავლების სინთეზი მეცნიერებს საშუალებას მისცემს, ადამიანის ჯანმრთელობის შესახებ დაგროვებული უზარმაზარი სამედიცინო მონაცემებიდან ახალი, კრიტიკულად მნიშვნელოვანი ცოდნა მიიღონ.
საბოლოო ჯამში, აღნიშნული კვლევები ფიზიკის კანონებს კომპლექსური ბიოლოგიური პროცესების ახსნასა და წინასწარ პროგნოზირებაში გამოიყენებს. თავად ქეთევანს კი მიაჩნია, რომ მისთვის ყველაზე ღირებული სწორედ ისეთ საკითხებზე მუშაობაა, რომელთა სიღრმისეულ შესწავლასაც ადამიანების ჯანმრთელობასა და ცხოვრების ხარისხზე რეალური, პოზიტიური გავლენის მოხდენა შეუძლია.
