რა უნდა ვიცოდეთ ცოფის შესახებ? ხშირად დასმული კითხვები

სურსათის ეროვნული სააგენტოს ინფორმაციით, მარტვილის მუნიციპალიტეტში ცხოველის ცოფით ინფიცირების შემთხვევა დადასტურდა. ვირუსი გამოუვლინდა უპატრონო ძაღლს, რომელიც ქუთაისის თავშესაფარში საეჭვო სტატუსით, იზოლირებულად იმყოფებოდა. 14 აპრილს მიღებულმა ლაბორატორიულმა კვლევამ (ოქმი #2465) ცოფის არსებობა დაადასტურა.

დაავადების კერაში, სოფელ ბანძაში, დაწესდა კარანტინი და დაიწყო სალიკვიდაციო სამუშაოები. ჩატარდა სრული დეზინფექცია, მათ შორის, ცხოველთა თავშესაფარშიც. ამჟამად მიმდინარეობს ცოფის ამთვისებელი ცხოველების იძულებითი ვაქცინაცია და მათი ჯანმრთელობის მკაცრი ზედამხედველობა.

საგანგებო მიმართვა მოქალაქეებს: სურსათის ეროვნული სააგენტო მოუწოდებს ყველა იმ პირს, ვისაც მარტვილის მუნიციპალიტეტის სოფელ ბანძაში, მარკეტ „ორი ნაბიჯის“ მიმდებარე ტერიტორიაზე კონტაქტი ჰქონდათ უპატრონო ძაღლთან, დაუყოვნებლივ მიმართონ სამედიცინო დაწესებულებას ანტირაბიული ვაქცინაციისთვის.

როგორ ამოვიცნოთ ცოფით ინფიცირებული ცხოველი?

ინფიცირებული ცხოველი ყოველთვის აგრესიული არ არის. ყურადღება მიაქციეთ ქცევის უცნაურ ცვლილებებს:

• ქცევის რადიკალური შეცვლა: წყნარი ცხოველი უეცრად შესაძლოა აგრესიული და თამამი გახდეს.

• ფიზიკური ნიშნები: ყლაპვის გაძნელება, პირიდან უხვი დორბლის დენა, ქვედა ყბის ჩამოწევა, ხმის ჩახლეჩა.

• უცნაური მადა: ცხოველი იწყებს არასაჭმელი საგნების (ქვების, მიწის, ხის) ჭამას.

• შიში: წყლისა და სინათლის მიმართ გამოხატული შიში (ჰიდროფობია და ფოტოფობია).

რატომ არის საჭირო კარანტინი?

კარანტინი დაავადების გავრცელების შეკავების ერთადერთი ეფექტური გზაა. ის გულისხმობს:

1. გადაადგილების შეზღუდვას: რათა ინფიცირებულმა ცხოველმა (რომელსაც სიმპტომები ჯერ არ გამოვლენია) ვირუსი კერიდან სხვაგან არ წაიღოს.

2. დაკვირვებას: რადგან ცოფის საინკუბაციო პერიოდი შეიძლება გრძელი იყოს, იზოლაცია საშუალებას იძლევა, დროულად გამოვლინდეს ახალი შემთხვევები.

რა უნდა ვქნათ, თუ ცხოველმა დაგვკბინა ან დაგვკაწრა?

1. დაუყოვნებლივ ჩამობანა: ჭრილობა მინიმუმ 15 წუთის განმავლობაში უნდა გაირეცხოს გამდინარე წყლითა და სამეურნეო საპნით (საპონი ანადგურებს ვირუსის გარსს).

2. ანტისეპტიკი: ჭრილობის დამუშავება სპირტით ან იოდით.

3. სწრაფი ვიზიტი ექიმთან: ცოფის სიმპტომების გამოვლენის შემდეგ დაავადება 100%-ით ფატალურია. ერთადერთი ხსნა დაუყოვნებლივი ვაქცინაციაა.

უსაფრთხოა თუ არა აცრა?

თანამედროვე ანტირაბიული ვაქცინები უსაფრთხოა და პრაქტიკულად არ გააჩნიათ გვერდითი მოვლენები. საგულისხმოა, რომ დღეისათვის იმუნიზაცია ხორციელდება მხრის დელტისებრ კუნთში და ვაქცინაციის კურსი მოიცავს რამდენიმე მარტივ მანიპულაციას შესაბამისი სქემის მიხედვით. სიცრუეა, რომ ცოფის საწინააღმდეგო ვაქცინაციის პროცესში მუცლის არეში 40 ინექციაა აუცილებელი.

დამატებითი კითხვების შემთხვევაში, დაუკავშირდით სურსათის ეროვნული სააგენტოს ცხელ ხაზს ან მიმართეთ უახლოეს სამედიცინო პუნქტს.