მეცნიერებმა შექმნეს ინოვაციური თვალის იმპლანტი, რომელიც მიზნად ისახავს უსინათლო პაციენტებისთვის მხედველობის ნაწილობრივ აღდგენას, კონკრეტულად კი ცენტრალური მხედველობის დაბრუნებას. მხედველობის ეს ასპექტი გადამწყვეტია კითხვისა და სხვა ყოველდღიური აქტივობებისთვის.
კვლევა, რომელიც New England Journal of Medicine-ში გამოქვეყნდა, მიუთითებს, რომ მოწყობილობამ საგრძნობლად გააუმჯობესა მხედველობა კვლევის იმ მონაწილეების 81 პროცენტში, რომლებიც დაავადებული იყვნენ ასაკთან დაკავშირებული მაკულარული დეგენერაციის (AMD) ფორმით, კერძოდ გეოგრაფიული ატროფიით. გეოგრაფიული ატროფია მიიჩნევა ხანდაზმულ ადამიანებში შეუქცევადი სიბრმავის წამყვან მიზეზად.
ბონის საუნივერსიტეტო ჰოსპიტალის ოფთალმოლოგიის დეპარტამენტის თავმჯდომარემ და ნაშრომის წამყვანმა ავტორმა, ფრანკ ჰოლცმა აღნიშნა, რომ კვლევა ადასტურებს, რომ პირველად ისტორიაში, შესაძლებელია ფუნქციური ცენტრალური მხედველობის აღდგენა პაციენტებში, რომლებიც დაბრმავდნენ გეოგრაფიული ატროფიის შედეგად.
AMD გამოწვეულია ბადურის დაზიანებით, რომელიც სინათლეს აღიქვამს და სიგნალებად გარდაქმნის ტვინისთვის. ახალი ტექნოლოგია მოიაზრებს სპეციალურ სათვალეებზე დამაგრებულ კამერას, რომელიც იღებს გამოსახულებებს და მათ 2მმ x 2მმ ზომის, უკაბელო ბადურის იმპლანტზე აპროექტებს. იმპლანტი შემდეგ სინათლეს ელექტრულ იმპულსებად გარდაქმნის, რომლებსაც ტვინს უგზავნის.
კვლევის შედეგები შთამბეჭდავია: 32 AMD-ით დაავადებული პაციენტიდან 84 პროცენტმა განაცხადა, რომ სახლის პირობებში წარმატებით იყენებდა ტექნოლოგიას და ახერხებდა ციფრების და სიტყვების წაკითხვას.
პიტსბურგის უნივერსიტეტის მედიცინის სკოლის ოფთალმოლოგიის დეპარტამენტის ხელმძღვანელმა და კვლევის უფროსმა ავტორმა, ჟოზე-ალენ საჰელმა, აღნიშნა, რომ ეს პირველი შემთხვევაა, როდესაც მხედველობის აღდგენის მცდელობამ ასეთ შედეგებს მიაღწია პაციენტების დიდ რაოდენობაში.
მოწყობილობა შემუშავებულია სტენფორდის უნივერსიტეტის ოფთალმოლოგიის პროფესორის, დანიელ პალანკერის დიზაინის მიხედვით და ფინანსდება ამერიკული კომპანია Science Corporation-ის მიერ. კომპანიამ უკვე მიმართა კლინიკური გამოყენების ავტორიზაციისთვის აშშ-სა და ევროპის მარეგულირებელ ორგანოებს.
წყარო: FT
