საქართველოს პარლამენტი დაჩქარებული წესით იხილავს საკანონმდებლო პაკეტს, რომელიც იძულებითი ფსიქიატრიული მკურნალობის დანიშვნის, მისი გაგრძელების მიზანშეწონილობის შეფასებისა და პაციენტის კლინიკიდან გაწერის წესებს ცვლის.
ცვლილებები „ფსიქიკური ჯანმრთელობის შესახებ“ კანონში, ასევე სისხლის სამართლისა და ადმინისტრაციულ საპროცესო კოდექსებში შედის. პროექტის ინიციატორები საპარლამენტო უმრავლესობის („ქართული ოცნება“) წევრები არიან. მათი განმარტებით, საკანონმდებლო ცვლილებების მიზანი მოქმედი ნორმების საკონსტიტუციო სასამართლოს გადაწყვეტილებასთან შესაბამისობაში მოყვანაა.
რა იცვლება კანონმდებლობაში:
მოქმედი რეგულაციით, იძულებით ფსიქიატრიულ მკურნალობას სისხლის სამართლის მოსამართლე მაქსიმუმ 4 წლის ვადით ნიშნავს. პარლამენტში წარდგენილი ახალი პროექტის თანახმად კი, პაციენტის მდგომარეობის გადაფასებისა და კონტროლის მექანიზმები იცვლება:
-
ყოველთვიური შეფასება: ფსიქიატრიული დაწესებულების სპეციალური კომისია ვალდებული იქნება, მკურნალობის დანიშვნიდან თვეში ერთხელ განიხილოს და დაადგინოს, კვლავ არსებობს თუ არა იძულებითი მკურნალობის გაგრძელების სამედიცინო და იურიდიული საფუძველი.
-
სასამართლო კონტროლი 6 თვეში ერთხელ: იძულებითი მკურნალობის შეფარდებიდან ყოველ 6 თვეში ერთხელ, დაწესებულების ადმინისტრაცია ვალდებულია, კომისიის გადაწყვეტილება და შესაბამისი სამედიცინო დოკუმენტაცია სასამართლოს გაუგზავნოს. სწორედ სასამართლო განიხილავს და მიიღებს საბოლოო გადაწყვეტილებას, ნარჩუნდება თუ არა პირის იძულებითი მკურნალობის საჭიროება.
-
გასაჩივრების მექანიზმი: კომისიის მიერ მიღებული გადაწყვეტილება, როგორც იძულებითი, ისე არანებაყოფლობითი მკურნალობის შემთხვევაში, ადმინისტრაციული წესით გასაჩივრებას დაექვემდებარება.
-
მკურნალი ექიმის უფლებამოსილება: უცვლელი რჩება მკურნალი ექიმის უფლება — მას ნებისმიერ დროს შეეძლება მიმართოს კომისიას და მოითხოვოს შეფასება, თუ მიიჩნევს, რომ პაციენტი ვადამდე გამოჯანმრთელდა.
წყარო: Interpressnews
