სქესობრივი გზით გადამდები დაავადებების (სგგდ) მატებამ აშშ-სა და ავსტრალიაში ახალშობილთა სიკვდილიანობის მკვეთრი ზრდა გამოიწვია. ექსპერტების შეფასებით, ეს არის სრულიად პრევენცირებადი ტრაგედია, რომელმაც ბოლო ათწლეულში ავსტრალიაში 42 ბავშვის სიცოცხლე შეიწირა, ხოლო ამერიკაში ინფიცირების მაჩვენებელი რეკორდულ ნიშნულზეა.
ამერიკის დაავადებათა კონტროლისა და პრევენციის ცენტრის (CDC) უახლესი მონაცემებით, თანდაყოლილი სიფილისი — როდესაც ინფექცია ორსული დედიდან ნაყოფს გადაეცემა — ბოლო 10 წელიწადში 700%-ით გაიზარდა. 2024 წელს აშშ-ში ამ დიაგნოზის 4000-მდე ახალი შემთხვევა დაფიქსირდა, რაც 1950-იანი წლების შემდეგ ყველაზე მაღალი მაჩვენებელია. კალიფორნიასა და ნიუ-იორკში ინფიცირების ტემპი ხუთჯერ გაიზარდა.
რატომ ვერ ხერხდება დაავადების შეჩერება?
სპეციალისტების განმარტებით, სიფილისი მარტივად დიაგნოსტირდება სისხლის ტესტით და სრულად იკურნება ანტიბიოტიკებით (მაგალითად, პენიცილინით). თუ ორსული დროულად იმკურნალებს, ბავშვისთვის რისკები ნულამდე მცირდება.
თუმცა, შემთხვევების ზრდას სამედიცინო სერვისებზე ხელმისაწვდომობის არარსებობა, დაზღვევის პრობლემები და ორსულობისას არასრულფასოვანი პრენატალური მეთვალყურეობა განაპირობებს. სტატისტიკა აჩვენებს, რომ იმ ქალებშიც კი, რომლებიც რეგულარულად დადიან ექიმთან, სიფილისზე შემოწმებას მხოლოდ 80% გადის.
კრიზისის საპასუხოდ, ნიუ-იორკმა უკვე აამოქმედა ახალი რეგულაცია: ორსულებისთვის სიფილისის სკრინინგი სავალდებულო გახდა პირველივე ვიზიტისას, მესამე ტრიმესტრში (28-32 კვირაზე) და უშუალოდ მშობიარობისას. ექსპერტები საზოგადოებრივი ჯანდაცვის ლიდერებისგან ითხოვენ, რომ კლინიკებში ხელმისაწვდომი გახდეს სწრაფი (სადიაგნოსტიკო) ტესტები და იმავე დღეს ინექციური პენიცილინით მკურნალობის დაწყების პრაქტიკა.
წყარო: NYPOST
