ევროკომისიამ ფარმაცევტული კომპანია Novo Nordisk-ის მიერ შემუშავებული პრეპარატის, Wegovy-ის (სემაგლუტიდი) 25 მგ-იანი პერორალური ფორმა სიმსუქნისა და ჭარბი წონის სამკურნალოდ დაამტკიცა. აღნიშნული გადაწყვეტილებით Wegovy გახდა პირველი პერორალური GLP-1 აგონისტი, რომელიც ევროკავშირის მასშტაბით სხეულის მასის კორექციის მიზნით ოფიციალურად იქნა ავტორიზებული. აღნიშნული ეტაპი სიმსუქნის ფარმაკოთერაპიაში მნიშვნელოვანი წინგადადგმული ნაბიჯია, რაც გლობალურ ბაზარზე კომპანიას სტრატეგიულ უპირატესობას ანიჭებს.
ევროკომისიის გადაწყვეტილება ეფუძნება ევროპის წამლის სააგენტოს (EMA) მიერ 2026 წლის მაისში გაცემულ დადებით რეკომენდაციას. პრეპარატი განკუთვნილია ზრდასრული პაციენტებისთვის, რომელთა სხეულის მასის ინდექსი (BMI) 27 კგ/მ² ან 30 კგ/მ² მეტია და აღენიშნებათ ჭარბ წონასთან დაკავშირებული სულ მცირე ერთი თანმხლები დაავადება, მათ შორის ტიპი 2 შაქრიანი დიაბეტი, არტერიული ჰიპერტენზია ან დისლიპიდემია. თერაპია გამოიყენება დაბალკალორიულ დიეტასა და რეგულარულ ფიზიკურ აქტივობასთან კომბინაციაში.
პრეპარატის ეფექტიანობა დადასტურდა კლინიკური კვლევებით, რომელთა შედეგების მიხედვით, Wegovy-ის პერორალური ფორმის მიღების ფონზე პაციენტებმა საშუალოდ სხეულის საწყისი მასის დაახლოებით 17% დაიკლეს, მაშინ როდესაც პლაცებოს ჯგუფში წონის საშუალო კლება დაახლოებით 3% იყო. აღნიშნული მონაცემები ადასტურებს, რომ პერორალური სემაგლუტიდი სიმსუქნის მართვის მიმართულებით ეფექტიან თერაპიულ მიდგომას წარმოადგენს და უზრუნველყოფს სხეულის მასის კლინიკურად მნიშვნელოვან შემცირებას.
პრეპარატის უსაფრთხოების პროფილი სემაგლუტიდის საინექციო ფორმისთვის უკვე დადგენილ მონაცემებს შეესაბამება. ყველაზე ხშირად კუჭ-ნაწლავის ტრაქტის არასასურველი მოვლენები ფიქსირდებოდა, ხოლო გვერდითი მოვლენების გამო მკურნალობის შეწყვეტის მაჩვენებელმა Wegovy-ის ჯგუფში 6.9%, ხოლო პლაცებოს ჯგუფში 5.9% შეადგინა, რაც პრეპარატის ტოლერანტობაზე მიუთითებს.
Novo Nordisk-ის აღმასრულებელი დირექტორის, მაიკ დუსტდარის განცხადებით, აღნიშნული გადაწყვეტილება სიმსუქნით დაავადებულ პაციენტებს მკურნალობის კიდევ ერთ ეფექტიან ალტერნატივას სთავაზობს. მისი შეფასებით, პრეპარატის ტაბლეტირებული ფორმა მრავალი პაციენტისთვის შესაძლოა უფრო მოსახერხებელი და მისაღები იყოს, ვიდრე საინექციო თერაპია, რაც მკურნალობისადმი პაციენტთა დამყოლობის გაუმჯობესებას შეუწყობს ხელს.
Wegovy-ის პერორალური ფორმა ამჟამად ხელმისაწვდომია აშშ-ში, გაერთიანებულ სამეფოსა და არაბთა გაერთიანებულ საამიროებში, ხოლო კომპანია 2026 წლის მეორე ნახევრიდან პრეპარატის ეტაპობრივ დანერგვას სხვა ქვეყნებშიც გეგმავს. ექსპერტთა შეფასებით, GLP-1 აგონისტების პერორალური ფორმის ბაზარზე გამოჩენა კიდევ უფრო გააფართოებს სიმსუქნის თანამედროვე ფარმაკოლოგიური მართვის შესაძლებლობებს და მნიშვნელოვნად შეცვლის აღნიშნული ქრონიკული დაავადების მკურნალობის კლინიკურ პრაქტიკას.
წყარო: www.reuters.com
