თანამედროვე ონკოლოგიის ერთ-ერთ უმთავრეს გამოწვევას ადრეული სტადიის ძუძუს კიბოს მქონე პაციენტებში თერაპიის ოპტიმალური ინტენსივობის განსაზღვრა წარმოადგენს. მკურნალობის გეგმის შერჩევა მნიშვნელოვნად არის დამოკიდებული სიმსივნის მოლეკულურ პროფილსა და სტადიაზე, თუმცა ადრეული სტადიის, ჰორმონრეცეპტორ-დადებითი (HR+) და HER2-უარყოფითი ინვაზიური კარცინომის მქონე პაციენტთა მართვისას კლინიცისტები ხშირად დგებიან თერაპიული დილემის წინაშე პერსონალიზებული ქიმიოთერაპიის საჭიროებასთან დაკავშირებით. სწორედ ამ გამოწვევის გადასაჭრელად აშშ-ის სურსათისა და წამლის ადმინისტრაციამ (FDA) ამერიკული ჯანდაცვის ტექნოლოგიების წამყვანი კომპანია Artera-ს მიერ შექმნილი ArteraAI Breast ციფრულ პათოლოგიაზე დაფუძნებული რისკის სტრატიფიკაციის პირველი ტესტი დაამტკიცა, რომელიც სრულიად იმართება ხელოვნური ინტელექტის მიერ. ინოვაციური ინსტრუმენტი კლინიცისტებს ადრეული სტადიის ჰორმონრეცეპტორ-დადებითი (HR+), HER2-ნეგატიური ინვაზიური ძუძუს კიბოს მქონე პაციენტებში მეტასტაზირების რისკის შეფასებასა და ქიმიოთერაპიის საჭიროების განსაზღვრაში დაეხმარება.
პლატფორმა იყენებს მულტიმოდალური ხელოვნური ინტელექტის (MMAI) მოდელს, რომელიც გაწვრთნილია 8,500-ზე მეტი პაციენტის კლინიკურ მონაცემზე. სისტემა აანალიზებს ქირურგიული რეზექციის შედეგად მიღებულ გაციფრულებულ ჰისტოპათოლოგიურ სლაიდებს და კლინიკურ ცვლადებს, რის საფუძველზეც ახდენს პაციენტების კლასიფიკაციას დაბალი და მაღალი რისკის ჯგუფებად.ტრადიციული გენომიური ტესტებისგან განსხვავებით, რომლებიც ხშირად ხანგრძლივ ლაბორატორიულ დამუშავებას საჭიროებს, ArteraAI ანალიზს ახორციელებს არსებული პათოლოგიური მასალის საფუძველზე, რაც პროცესს უფრო ოპერატიულს ხდის.
„როგორც FDA-ს კლინიკურმა ვალიდაციამ აჩვენა, ხელოვნური ინტელექტის ამ მოდელს შეუძლია ზუსტად იწინასწარმეტყველოს მეტასტაზების რისკი და დააჯგუფოს პაციენტები MMAI დაბალი ან MMAI მაღალი რისკის ჯგუფებად შესაბამისი რისკის ქულის მიხედვით. პაციენტებს, რომლებსაც აქვთ დაბალი რისკის პროფილი, აქვთ კიბოს რეციდივის გაცილებით დაბალი შანსი; შესაბამისად, მათ არ სჭირდებათ იგივე მკურნალობის ინტენსივობა, როგორიც პაციენტებს, რომლებსაც აქვთ მაღალი რისკის პროფილი. ArteraAI ანალიზის შედეგები, რომელიც მოიცავს პერსონალიზებულ AI რისკის ქულას და მასთან დაკავშირებულ MMAI რისკის ჯგუფებს, დაეხმარება ონკოლოგებსა და პაციენტებს სწორი მკურნალობის დაგეგმვასა და გადაწყვეტილებების მიღებაში“ — განაცხადა კალვინ ჩაომ, მედიცინის დოქტორმა, ციფრული ჯანდაცვის კომპანია Artera-ს სამედიცინო მეცნიერებების ვიცე-პრეზიდენტმა.
რისკის ზუსტი სტრატიფიკაცია საშუალებას იძლევა თავიდან იქნას აცილებული როგორც არასაკმარისი მკურნალობა, ისე ჰიპერთერაპია. დაბალი რისკის პროფილის მქონე პაციენტების (განსაკუთრებით პოსტმენოპაუზის ასაკის ქალები კვანძზე უარყოფითი პასუხით) იდენტიფიცირება შესაძლებელს ხდის თავიდან იქნეს არიდებული ჭარბი ქიმიოთერაპიის პროცედურები და მისი გვერდითი ეფექტები, როგორებიც არის ნეიროპათია, ფერტილობის დაქვეითება და ინფექციური გართულებები.
მიუხედავად იმისა, რომ ტექნოლოგია მაღალ პროგნოზულ სიზუსტეს აჩვენებს, ექსპერტები ხაზს უსვამენ დამატებითი კლინიკური კვლევებისა და სანდო, რეცენზირებული მტკიცებულებების აუცილებლობას. ArteraAI Breast-ის კლინიკურ პრაქტიკაში დასანერგად საჭიროა პროსპექტული, პირდაპირი კლინიკური კვლევების მონაცემები, რომლებიც მის ეფექტურობას შეადარებს არსებულ „ოქროს სტანდარტებთან“, როგორიცაა Oncotype DX.
წყარო: medicalnewstoday.com
