ლეიდენის უნივერსიტეტის სამედიცინო ცენტრის (LUMC) მეცნიერებმა და ბიოტექნოლოგიურმა კომპანია Ncardia-მ გულის 3D მიკროქსოვილების ავტომატიზებული წარმოების უზრუნველსაყოფად უნიკალური პლატფორმა შექმნეს.
აღნიშნული ტექნოლოგია მეცნიერებს მოკლე დროში ათასობით პრეპარატის გამოცდის საშუალებას მისცემს, რაც გულ-სისხლძარღვთა დაავადებების მკურნალობაში გადადგმული მნიშვნელოვანი ნაბიჯია.
გულის თანდაყოლილი არითმიები მსოფლიოში ყოველ 2,000 ადამიანში ერთს აწუხებს. ეს არითმიები უეცარი სიკვდილის ან სიცოცხლისთვის საშიში გართულებების მიზეზი ხშირად ხდება.
აქამდე ამ მდგომარეობების მკურნალობა შეზღუდული იყო, რადგან გულის იშვიათი დაავადებების შესწავლა ცხოველურ მოდელებზე, ადამიანის გულის ანატომიური და ფიზიოლოგიური სირთულის გამო, არაზუსტ შედეგებს იძლეოდა, ხოლო პაციენტის ცოცხალ ქსოვილზე წვდომა ექსპერიმენტებისთვის პრაქტიკულად შეუძლებელი და სახიფათო იყო.
ტრადიციული მეთოდებისგან განსხვავებით, ახალი პლატფორმა ადამიანის პლურიპოტენტურ ღეროვან უჯრედებს იყენებს. კვლევის ავტორების განმარტებით, ეს უჯრედები ლაბორატორიაში ნებისმიერ სხვა უჯრედად შეიძლება გარდაიქმნას.
თუ ადრე მეცნიერები გულის კუნთის უჯრედების მხოლოდ ერთ ფენას სწავლობდნენ, ახლა მათ შექმნეს რთული 3D მიკროქსოვილები, რომლებიც მაქსიმალურად იმეორებენ ადამიანის გულის ბიოლოგიას.
სპეციალური ფლუორესცენტული საღებავებისა და რობოტექნიკის დახმარებით, მეცნიერებს შეუძლიათ დეტალურად დააკვირდნენ, როგორ რეაგირებს ხელოვნური „მინი-გული“ სხვადასხვა მედიკამენტზე.
ახალი პლატფორმის ეფექტურობის დასამტკიცებლად, გუნდმა უკვე 2,000-ზე მეტი პრეპარატი შეამოწმა და 100-მდე ნივთიერება გამოავლინა, რომელთაც გულის რიტმის დარღვევის გამოსწორება შეუძლიათ.
წყარო: Cell
