მსოფლიო ჯანდაცვის ორგანიზაციის (WHO) უახლესი ანგარიშის მიხედვით, ევროპაში ყოველი მესამე ექიმი და ექთანი დეპრესიას ებრძვის. კვლევამ, რომელიც 90,000-ზე მეტ სამედიცინო მუშაკს მოიცავდა, გამოავლინა, რომ ყოველი მეათე რესპონდენტი გასული წლის განმავლობაში პასიურ სუიციდურ ფიქრებს განიცდიდა.
ანგარიშის თანახმად, მედპერსონალის მენტალური მდგომარეობის გაუარესების ერთ-ერთი მთავარი მიზეზი გაუსაძლისი სამუშაო პირობებია. გამოკითხულთა მესამედმა სამუშაო ადგილზე ბულინგი ან ძალადობრივი მუქარა გამოსცადა, ხოლო 10%-მა ფიზიკური ძალადობისა და სექსუალური შევიწროების ფაქტებიც დააფიქსირა. ამას ემატება ქრონიკული ზეგანაკვეთური შრომა – ექიმების მეოთხედი კვირაში 50 საათზე მეტს მუშაობს, რაც მათ ფიზიკურ და ემოციურ გამოფიტვას იწვევს.
მედიკოსების გადაწვის სინდრომი პაციენტებს პირდაპირ საფრთხეს უქმნის, რადგან გამოფიტული პერსონალი უფრო ხშირად უშვებს სამედიცინო შეცდომებს. კადრების გადინება კიდევ ერთი სერიოზული გამოწვევაა: სამედიცინო მუშაკების 34%-მდე პროფესიიდან წასვლაზე ფიქრობს. პროგნოზების მიხედვით, 2030 წლისთვის ევროპაში კადრების დეფიციტი თითქმის მილიონს (940,000) მიაღწევს, რაც მკვეთრად გაზრდის ლოდინის დროს და გააუარესებს სამედიცინო მომსახურების ხარისხს.
WHO მოუწოდებს ჯანდაცვის სისტემებს, დაუყოვნებლივ მიიღონ ზომები მუშაკთა კეთილდღეობისთვის. რეკომენდაციები მოიცავს სამუშაო ადგილზე ძალადობის მიმართ „ნულოვანი ტოლერანტობის“ დანერგვას, მორიგეობის გრაფიკების გადახედვას და მედპერსონალისთვის ფსიქოლოგიური მხარდაჭერის ხელმისაწვდომობას.
ექსპერტების შეფასებით, მედიკოსების მენტალური კრიზისი რეალურად ჯანდაცვის უსაფრთხოების კრიზისია, რადგან სისტემის მდგრადობა სწორედ მათ ჯანმრთელობაზეა დამოკიდებული.
წყარო: EURONEWS
