ამერიკელმა მეცნიერებმა აღმოაჩინეს, რომ მარიხუანის ორი აქტიური კომპონენტისგან (THC და CBD) დამზადებული სპეციალური სამედიცინო ფორმულა საგრძნობლად ამცირებს შფოთვას, მოუსვენრობასა და აგრესიას გვიანი სტადიის დემენციის მქონე პაციენტებში. კლინიკური კვლევის შედეგები, რომელიც თავისი მასშტაბით პირველია, ლონდონში გამართულ ალცჰაიმერის ასოციაციის საერთაშორისო კონფერენციაზე წარადგინეს.
დემენციისა და ალცჰაიმერის მძიმე ფორმების დროს, პაციენტების შფოთვა და ემოციური აღზნებადობა ერთ-ერთი ყველაზე რთული პრობლემაა როგორც თავად დაავადებულებისთვის, ისე მათი მომვლელებისთვის. ამჟამად არსებულ პრეპარატებს (როგორცაა მორფი ან ველიუმი) ხშირად დაბალი ეფექტურობა აქვთ და მძიმე გვერდითი მოვლენებით ხასიათდებიან. ახალი კვლევის ფარგლებში, რომელსაც „LiBBY“ ეწოდა, მეცნიერებმა 120 მძიმე პაციენტს სწრაფმოქმედი, დასალევი ზეთის სახით მიაწოდეს გაწმენდილი THC-ისა და CBD-ის ნაზავი.
შედეგებმა ყოველგვარ მოლოდინს გადააჭარბა: პაციენტების თითქმის 90%-ში (კერძოდ, 87,2%-ში) 12 კვირის შემდეგ მდგომარეობის მკვეთრი გაუმჯობესება დაფიქსირდა, ხოლო შფოთვის დონის კლება მკურნალობის დაწყებიდან ორ კვირაში უკვე აშკარა იყო. მკვლევარების განცხადებით, დემენციის კლინიკურ ცდებში პაციენტების ასეთი მაღალი დადებითი რეაგირება ახალ მედიკამენტზე უკიდურესად იშვიათი და შთამბეჭდავი მოვლენაა. ამასთან, გვერდითი მოვლენების მაჩვენებელი იმდენად დაბალი იყო, რომ ის პლაცებოს ჯგუფის მონაცემებს არ აღემატებოდა.
მიუხედავად ასეთი იმედისმომცემი შედეგებისა, მეცნიერები მკაცრად აფრთხილებენ მოსახლეობას, რომ ეს ფორმულა რადიკალურად განსხვავდება კომერციულად ხელმისაწვდომი კანაფის პროდუქტებისგან. ექიმების განმარტებით, აფთიაქებში ან ონლაინ გაყიდული ზეთებისა და პრეპარატების შემადგენლობა, ხარისხი და დოზირება კონტროლირებადი არ არის, რამაც შეიძლება პაციენტს სარგებლის ნაცვლად სერიოზული ზიანი მიაყენოს, კვლევაში გამოყენებული მედიკამენტი კი მკაცრი სამედიცინო ზედამხედველობის ქვეშ, ლაბორატორიულად იყო მომზადებული.
წყარო: NYTIMES
