ჟურნალ JAMA Psychiatry-ში გამოქვეყნებული ახალი კვლევის თანახმად, კეტო დიეტა შესაძლოა ეფექტური იმ პაციენტებისთვის აღმოჩნდეს, რომლებსაც დეპრესიის მკურნალობისას ანტიდეპრესანტები არ ეხმარებათ.
ოქსფორდის უნივერსიტეტის მკვლევრებმა განსაზღვრეს, რომ ექვსი კვირის განმავლობაში კეტო დიეტაზე მყოფ ადამიანებს დეპრესიის სიმპტომები უფრო მეტად შეუმცირდათ, ვიდრე მათ, ვინც მცენარეულ კვებაზე იყო ორიენტირებული.
როგორ მოქმედებს კეტო დიეტა ტვინზე?
კეტო დიეტის არსი იმაში მდგომარეობს, რომ ორგანიზმი ენერგიის წყაროდ გლუკოზის ნაცვლად ცხიმებისგან მიღებულ კეტონებს იყენებს. სტენფორდის მედიცინის სკოლის განმარტებით, კეტოზის მდგომარეობამ შესაძლოა ნეირონები დაასტაბილუროს და ანთებითი პროცესები ტვინში შეამციროს, ყოველივე ეს ფსიქიკურ ჯანმრთელობაზე პირდაპირ აისახება.
კვლევაში მონაწილე 88 ადამიანიდან მათ, ვინც დღეში 30 გრამზე ნაკლებ ნახშირწყალს იღებდა, დეპრესიის 27-ქულიან შკალაზე 10.5-ქულიანი გაუმჯობესება აჩვენეს.
ექსპერტების მოსაზრება
მიუხედავად იმედისმომცემი შედეგებისა, ექსპერტები რამდენიმე მნიშვნელოვან გამოწვევაზე ამახვილებენ ყურადღებას, რომელთა შორის უმთავრესი დიეტის შენარჩუნების სირთულეა. კეტო რეჟიმი იმდენად მკაცრია, რომ კვლევის დასრულების შემდეგ მონაწილეთა მხოლოდ 9%-მა შეძლო მისი გაგრძელება. ეს ფაქტი იმაზე მიუთითებს, რომ მეთოდი ბევრი პაციენტისთვის გრძელვადიან პერსპექტივაში ნაკლებად პრაქტიკულია.
ექიმები ასევე მიიჩნევენ, რომ მსგავსი ანტიდეპრესიული ეფექტის მიღწევა შესაძლებელია უფრო ხელმისაწვდომი ალტერნატივებით, როგორიცაა, მაგალითად, ჯანსაღი კვება, წონის კონტროლი და რეგულარული ფიზიკური აქტივობა.
გარდა ამისა, კვლევის წარმატებაში დიდი როლი ითამაშა იმ ინტენსიურმა სოციალურმა და პროფესიულმა მხარდაჭერამ, რომელსაც პაციენტები სპეციალისტებისგან იღებდნენ; ეს კი კიდევ ერთხელ ადასტურებს, რომ დეპრესიასთან ბრძოლაში ადამიანური ფაქტორი და სოციალური ჩართულობა ხშირად ისეთივე გადამწყვეტია, როგორც თავად კვების რაციონი.
სპეციალისტები აღნიშნავენ, რომ კეტო დიეტა შეიძლება განხილულ იქნას როგორც დამხმარე საშუალება დეპრესიის დროს, თუმცა ის არ წარმოადგენს ტრადიციული მკურნალობის სრულფასოვან ჩანაცვლებას.
წყარო: JAMA
