ინოვაციურმა AI პროგრამულმა უზრუნველყოფამ, რომელიც სპეციალურად დემენციის მქონე ადამიანების დასახმარებლად შეიქმნა, პრესტიჟული ბრიტანული ჯილდო, Longitude Prize on Dementia, და 1 მილიონი ფუნტი სტერლინგი მოიგო. ტექნოლოგია, სახელწოდებით CrossSense, პაციენტებს დამოუკიდებლობის შენარჩუნებაში ეხმარება.
როგორ მუშაობს CrossSense?
სისტემა ჩაშენებულია სმარტ-სათვალეში, რომელიც აღჭურვილია კამერით, მიკროფონითა და დინამიკებით. მისი მთავარი ღირსება ვირტუალური ასისტენტი Wispy-ია. ვირტუალური ასისტენტი Wispy მომხმარებელს რეალურ დროში ეხმარება ყოველდღიური საქმეების შესრულებაში, მაგალითად, ნივთების პოვნაში ან ჩაიდნის ადუღებაში, რისთვისაც ხმოვან და ვიზუალურ შეტყობინებებს იყენებს.
გარდა პრაქტიკული დახმარებისა, ხელოვნურ ინტელექტს შეუძლია პაციენტთან მცირე საუბრების გამართვა, კითხვების დასმა და ძველი მოგონებების აღდგენაში დახმარება, რაც მნიშვნელოვნად აუმჯობესებს ადამიანის სოციალურ ინტერაქციას.
ტესტირებამ აჩვენა, რომ ამ სათვალის გამოყენება მეხსიერებას საგრძნობლად აუმჯობესებს. თუ მის გარეშე პაციენტები ნივთების ნახევარსაც ვერ ცნობდნენ, სათვალის დახმარებით მათმა უმრავლესობამ (82%) საოჯახო ნივთების სწორად დასახელება შეძლო. ყველაზე მნიშვნელოვანი კი ის არის, რომ სათვალეს ერთგვარი „სავარჯიშო“ ეფექტიც აქვს, რადგან მისი მოხსნიდან ერთი საათის შემდეგაც კი, პაციენტებს ნივთების თითქმის 80% ისევ ახსოვდათ.
როდის იქნება ხელმისაწვდომი?
ტექნოლოგიის ბაზარზე გამოჩენა რამდენიმე ეტაპად იგეგმება: 2026 წლის ბოლოსთვის ჯერ სმარტფონის ვერსია გამოვა, პარალელურად კი, ბოლო კვარტალში, პაციენტების სახლებში სათვალეების ოთხკვირიანი საპილოტე ტესტირება დაიწყება, რაც საბოლოოდ გზას გაუხსნის სმარტ-სათვალეების გაყიდვაში ჩაშვებას 2027 წლის დასაწყისიდან.
რა ეღირება სმარტ სათვალე?
სათვალის ღირებულება დაახლოებით 1,000 ფუნტია, ხოლო მისი პროგრამული უზრუნველყოფის ყოველთვიური გამოწერა 50 ფუნტი დაჯდება, თუმცა ფინანსურ მხარესთან ერთად ექსპერტები ისეთ გამოწვევებზეც მიუთითებენ, როგორიცაა, მაგალითად, ელემენტის მოცულობა, რომელიც მხოლოდ ერთი საათი ძლებს, მონაცემთა დაცვა და ეთიკური საკითხები.
მიუხედავად ამ ტექნიკური ბარიერებისა, პაციენტებისთვის, მაგალითად 70 წლის კეროლ გრეიგისთვის, ეს მოწყობილობა ნამდვილი „საოცრებაა“, რადგან ის მას დამოუკიდებლობას უბრუნებს, ახლობლებისთვის ტვირთად ყოფნის განცდას უმსუბუქებს და ცხოვრებით ტკბობის საშუალებას აძლევს.
რატომ არის სტარტაპისთვის მნიშვნელოვანი 1 მილიონიანი ჯილდო?
1 მილიონი ფუნტის ოდენობის ჯილდო გადამწყვეტია ამ სტარტაპისთვის, რადგან ის კომპანიას საშუალებას აძლევს, 2026 წლის ბოლოსთვის ინოვაციური ტექნოლოგიის ფართო მასშტაბიანი ტესტირება დაიწყოს.
მიუხედავად იმისა, რომ სათვალე ამჟამად 1,000 ფუნტი ღირს, ავტორების მიზანია მისი გაიაფება და სახელმწიფო ჯანდაცვის სისტემაში (NHS) ჩართვა, რათა დემენციის მქონე ადამიანებისთვის ის უფრო ხელმისაწვდომი გახდეს.
წყარო: The Guardian
