ორეგონის ჯანმრთელობისა და მეცნიერების უნივერსიტეტის (OHSU) მკვლევრებმა უშვილობის მკურნალობისთვის უნიკალური კონცეფცია წარმოადგინეს. მათ კანის უჯრედები გარდაქმნეს კვერცხუჯრედებად, რომლებმაც შეძლეს ემბრიონების წარმოქმნა. კვლევა, რომელიც Nature Communications-ში გამოქვეყნდა, პერსპექტიულია უშვილობის წინააღმდეგ ბრძოლაში.
ეს მიღწევა უშვილობის მკურნალობის ახალ პერსპექტივას ქმნის, რადგან შესაძლებელი ხდება ლაბორატორიაში სასქესო უჯრედების (კვერცხუჯრედების) შექმნა. ეს განსაკუთრებით მნიშვნელოვანია ასაკში შესული ქალებისა და იმ პირებისთვის, რომლებთაც კიბოს მკურნალობის ან სხვა სამედიცინო მიზეზების გამო არ შეუძლიათ სიცოცხლისუნარიანი კვერცხუჯრედების ბუნებრივად წარმოქმნა.
მკვლევრებმა შეიმუშავეს უჯრედის დაყოფის ახალი, მესამე მეთოდი, რომელსაც “მიტომეიოზი” უწოდეს, რაც მიანიშნებს მიტოზისა და მეიოზის კომბინაციაზე. OHSU-ს ემბრიონული უჯრედისა და გენური თერაპიის ცენტრის დირექტორი, დოქტორი შოუხრატ მიტალიპოვი, აცხადებს, რომ მათ მიაღწიეს იმას, რაც აქამდე შეუძლებლად მიიჩნეოდა.
მიტომეიოზის პროცესი მოიცავდა კანის უჯრედის ბირთვის დონორი კვერცხუჯრედში გადანერგვას. ამის შედეგად, ბირთვმა დატოვა ქრომოსომების ნახევარი (23 ქრომოსომა), რის შემდეგაც ახალი კვერცხუჯრედი სპერმით იქნა განაყოფიერებული ინ ვიტრო განაყოფიერების (IVF) სტანდარტული მეთოდით.
სულ 82 ფუნქციური კვერცხუჯრედი იქნა წარმოქმნილი და განაყოფიერებული, თუმცა მათ უმრავლესობაში ქრომოსომული დარღვევები გამოვლინდა. მიუხედავად ამისა, 9%-მა მიაღწია ბლასტოცისტის სტადიას — ემბრიონის განვითარების ეტაპს.
მკვლევრები ხაზს უსვამენ, რომ ეს მიღწევა ამ ეტაპზე მხოლოდ კონცეფციის მეცნიერული დამტკიცებაა და საჭიროა მინიმუმ ათწლიანი შემდგომი კვლევა, რათა უზრუნველყოფილი იყოს მისი უსაფრთხოება და ეფექტურობა კლინიკურ კვლევებზე გადასვლამდე.
