28 მარტს მთავრობის ადმინისტრაციასთან დიუშენის კუნთოვანი დისტროფიის მქონე ბავშვების მშობლებმა კიდევ ერთი საპროტესტო აქცია გამართეს. ისინი ჯანდაცვის მინისტრ მიხეილ სარჯველაძეს უნდობლობას უცხადებენ და მისი თანამდებობიდან გადადგომას მოითხოვენ.
პროტესტის მონაწილეთა ძირითადი მოთხოვნა პრემიერ-მინისტრ ირაკლი კობახიძესთან საჯარო, მედიის თანდასწრებით შეხვედრის ორგანიზებაა. მათი შეფასებით, ჯანდაცვის მინისტრის მიერ პრემიერისთვის მიწოდებული ინფორმაცია სრულად ვერ ასახავს პაციენტთა რეალურ საჭიროებებს, რაც აფერხებს დროული და ეფექტიანი გადაწყვეტილებების მიღებას, განსაკუთრებით იმ პირობებში, როდესაც პაციენტებისთვის „ყოველი დღე და საათი გადამწყვეტია“.
აქცია წუთიერი დუმილით დაიწყო — 3 მარტს საქართველომ აღნიშნული დაავადებით კიდევ ერთი, 17 წლის მოზარდი დაკარგა, რაც ბოლო ერთი წლის განმავლობაში მესამე ფატალური შემთხვევაა.
ორგანიზაციის „ერთად ვებრძოლოთ დიუშენის კუნთოვან დისტროფიას“ თავმჯდომარემ, ზაქარია გვიშიანმა, ხელისუფლებას ხუთდღიანი ვადა მისცა მოთხოვნების შესრულებისთვის:
“ღია შეხვედრა უნდა მოეწყოს პრემიერთან ერთად, თუნდაც იყოს იქ ჯანდაცვის მინისტრი, ექიმები – რა თქმა უნდა, რომლებიც მხარს გვიჭერენ ბოლომდე. განიხილება ეს საკითხი და საბოლოოდ, საჯაროდ დადასტურდება, რომ ჩვენი ჯანდაცვის მინისტრი არის მატყუარა… ჩვენ ვითხოვთ, რომ 5 დღის ვადაში, არა ულტიმატუმის სახით – რა თქმა უნდა, ამ ვადაში შევხვდეთ პრემიერ-მინისტრს, რათა ვუთხრათ სიმართლე, ჯანდაცვის მინისტრის თანდასწრებით. მას [მინისტრს] არაფერი ექნება სათქმელი… სხვა შემთხვევაში, ჩვენ გავმართავთ უწყვეტ ქუჩის აქციებს და შესაძლოა, კარვებშიც კი დავრჩეთ”.
გვიშიანის ინფორმაციით, მშობლებმა პროტესტის ნიშნად დატოვეს ჯანდაცვის სამინისტროში გამართული ბოლო სამუშაო შეხვედრაც. აქციის მონაწილეები სისტემატურად მიმართავენ სახელმწიფოს მათი შვილების სიცოცხლისთვის კრიტიკულად აუცილებელი მედიკამენტების შემოტანის და სამედიცინო კვლევების დაფინანსების მოთხოვნით. გარდა ამისა, ისინი მოითხოვენ მულტიდისციპლინური სამედიცინო გუნდის შექმნას, რომელიც უზრუნველყოფს პაციენტთა უწყვეტ, ინტეგრირებულ და მრავალპროფილურ კლინიკურ მონიტორინგს.
აღსანიშნავია ისიც, რომ ბოლო ერთი წლის განმავლობაში მშობლები არაერთხელ შეხვდნენ ჯანდაცვის სამინისტროს წარმომადგენლებს, თუმცა, მათი შეფასებით, საკითხი კვლავ მოუგვარებელია. 2026 წლის თებერვალში მთავრობის ადმინისტრაციის ხელმძღვანელთან, ლევან ჟორჟოლიანთან შეხვედრის შემდეგ მათ მიიღეს საკითხის შესწავლის დაპირებაც, თუმცა კონკრეტული შედეგი ამ დრომდე არ დამდგარა.
არსებული მონაცემებით, საქართველოში დიუშენის კუნთოვანი დისტროფიით დაახლოებით 100 პაციენტი ცხოვრობს, რომელთა უმრავლესობა ბავშვია. დაავადება გენეტიკურია, იწვევს კუნთების პროგრესულ სისუსტესა და ატროფიას და თერაპიული მკურნალობის გარეშე, ხშირად ნაადრევი სიკვდილით მთავრდება.
