ამერიკულ და ბრიტანულ სამეცნიერო წრეებში რეზონანსი გამოიწვია ჟურნალ The Lancet-ში გამოქვეყნებულმა უახლესმა კვლევამ, რომლის მიხედვითაც, ადრეულ მოზარდობაში ადამიანის პაპილომა ვირუსის (HPV) საწინააღმდეგო ვაქცინის მიღება 30 წლამდე ასაკის ქალებში საშვილოსნოს ყელის კიბოთი სიკვდილის ალბათობას თითქმის ნულამდე ამცირებს. ლონდონის დედოფალ მერის უნივერსიტეტის (QMUL) მეცნიერების მიერ ჩატარებული ეს მასშტაბური ანალიზი პირველი პირდაპირი მტკიცებულებაა იმისა, თუ როგორ აისახება ვაქცინაცია პაციენტების გადარჩენის გრძელვადიან მაჩვენებელზე.
ჯანდაცვის მსოფლიო ორგანიზაციის (WHO) მონაცემებით, საშვილოსნოს ყელის კიბო ქალებში მეოთხე ყველაზე გავრცელებული ონკოლოგიური დაავადებაა და შემთხვევათა 99%-ს სწორედ მაღალი რისკის HPV ვირუსები იწვევს. მიუხედავად იმისა, რომ ვაქცინის ეფექტურობა დაავადების პრევენციაში (დაახლოებით 90%) აქამდეც ცნობილი იყო, კვლევამ პირველად აჩვენა მისი გავლენა ლეტალობის სტატისტიკაზე.
2008 წელს ბრიტანეთში ვაქცინაციის პროგრამის დაწყების შემდეგ, სიკვდილიანობის დრამატული კლება დაფიქსირდა: 12-13 წლის ასაკში აცრილ გოგონებში 30 წლამდე ასაკში გარდაცვალების რისკი პრაქტიკულად გაქრა, ხოლო 30-34 წლის ასაკობრივ ჯგუფში ლეტალობის შეფარდებითი რისკი 63%-ით შემცირდა. უფრო მეტიც, ისტორიაში პირველად, 2020 წლიდან 2024 წლამდე პერიოდში ინგლისში 20-24 წლის ასაკის არცერთი ქალი არ გარდაცვლილა ამ დიაგნოზით.
პროექტის წამყვანი ავტორის, პროფესორ პიტერ სასიენის განცხადებით, ვაქცინამ მხოლოდ ინგლისში უკვე გადაარჩინა ასობით ახალგაზრდა ქალის სიცოცხლე. შეგახსენებთ, რომ ეს აცრა, საშვილოსნოს ყელის გარდა, იცავს ორგანიზმს ანუსის, საშოს, ვულვის, პირის ღრუსა და ყელის კიბოსგან, ასევე გენიტალური მეჭეჭებისგან.
მიუხედავად ისტორიული სამედიცინო მიღწევისა, ექსპერტები საგანგაშო ტენდენციებზე ამახვილებენ ყურადღებას. WHO-ს გლობალური სტრატეგიით, 2030 წლისთვის მსოფლიოს ყველა ქვეყანამ 15 წლამდე გოგონების 90%-ის ვაქცინირება უნდა უზრუნველყოს. პანდემიამდე ბრიტანეთი ამ ნიშნულთან ახლოს იყო, თუმცა ბოლო პერიოდში ვაქცინაციის მაჩვენებელი ეროვნულ დონეზე 75%-მდე, ხოლო ლონდონში 60%-მდე დაეცა.
წყარო: The Guardian
