ნიუ-იორკის უნივერსიტეტის გროსმანის სამედიცინო სკოლის ახალი კვლევა პირუვატს წყლულოვანი კოლიტის (UC) პოტენციურ სამკურნალო საშუალებად მიიჩნევს. ეს კვლევა არა მხოლოდ აღრმავებს ჩვენს ცოდნას UC-ის შესახებ, არამედ ახალ, უსაფრთხო მიდგომას გვთავაზობს მის სამკურნალოდ.
წყლულოვანი კოლიტი ნაწლავის ქრონიკული ანთებითი პათოლოგიაა, რომელიც ტკივილით, დიარეით, წონის კლებითა და ზოგადი სისუსტით ვლინდება. მიუხედავად იმისა, რომ არსებული სამკურნალო საშუალებები ეფექტურია, მათი ხანგრძლივი გამოყენება ხშირად სერიოზულ გვერდით ეფექტებთან არის დაკავშირებული.
რატომ პირუვატი?
სინთეზური მედიკამენტებისგან განსხვავებით, პირუვატი ბუნებრივი ბიოქიმიური ნივთიერებაა, რომელიც გლუკოზის მეტაბოლიზმის დროს წარმოიქმნება. იგი ანტიოქსიდანტური თვისებებითაც ხასიათდება.
მკვლევრებმა შეისწავლეს, შეეძლო თუ არა პირუვატს ნაწლავში ანთების შემცირება. ეს ეფექტი თაგვის მოდელებსა და ლაბორატორიულ უჯრედებზე შემოწმდა. აღმოჩნდა, რომ პირუვატს ერთგვარი დამამშვიდებელი ეფექტი აქვს იმუნურ სისტემაზე – აჩერებს ჰიპერმგრძნობელობით იმუნურ რეაქციებს და იცავს ნაწლავის ლორწოვან გარსს.
პირუვატი თრგუნავს ანთებას (TNFα/NF-κB სასიგნალო გზის ინჰიბირებით), ამტკიცებს ნაწლავის დამცავ ბარიერს და ამცირებს დაავადების სიმძიმეს თაგვებში. გარდა ამისა, გამოვლინდა, რომ ფერმენტი cPLA2 პირუვატისთვის მნიშვნელოვანი სამიზნეა. თაგვებზე ჩატარებულმა ცდებმა დაადასტურა, რომ cPLA2-ის გარეშე პირუვატი არაეფექტურია, რითაც ფერმენტის საკვანძო როლი დადასტურდა.
ამ მიმართულებით კვლევები უნდა გაგრძელდეს. თუ ეს შედეგები ადამიანებშიც დადასტურდება, პირუვატი შეიძლება გახდეს წყლულოვანი კოლიტის უსაფრთხო სამკურნალო საშუალება.
წყარო: ScienceDirect
