ყოველწლიურად ათასობით ადამიანი იზიანებს თვალს თავის მოვლის საშუალებებით — კვლევა

ყოველდღიურმა კოსმეტიკურმა და თავის მოვლის საშუალებებმა, შესაძლოა, თვალის სერიოზული დაზიანება გამოიწვიოს. ამერიკის ოფთალმოლოგიის აკადემიის (AAO) ყოველწლიურ შეხვედრაზე წარდგენილი ახალი კვლევის თანახმად, ყოველწლიურად ათასობით ადამიანი ხვდება გადაუდებელი დახმარების განყოფილებებში (ER) თვალის დაზიანებებით, რომლებიც გამოწვეულია თმის დასახვევი ან გასასწორებელი ცხელი ხელსაწყოების, სახის სპრეების, წამწამების წებოს, ფრჩხილის მოვლის პროდუქტებისა და თვალის მაკიაჟის გამოყენებით.

კოსმეტიკური პროდუქტები ერთი შეხედვით დაბალი რისკის შემცველად გვეჩვენება, რადგან ისინი ყოველდღიური მოხმარების საგნებია. თუმცა, თვალთან შეხებისას, განსაკუთრებით ქიმიური ნივთიერებების მოხვედრისას ან ძალიან ცხელი მოწყობილობების შეხებისას, მათ სერიოზული დაზიანების გამოწვევა შეუძლიათ.

კვლევის ძირითადი მიგნებები და სტატისტიკა

მკვლევრებმა დაზიანებების ეროვნული ელექტრონული მეთვალყურეობის სისტემის (NEISS) 2005–2024 წლების მონაცემები გააანალიზეს. შედეგებმა აჩვენა, რომ აღნიშნულ პერიოდში აშშ-ის გადაუდებელი დახმარების განყოფილებებს 42 500-მდე ადამიანმა მიმართა კოსმეტიკური პროდუქტებით გამოწვეული თვალის ტრავმით; შემთხვევების 82% (5-დან 4) ქალებსა და გოგონებზე მოდიოდა; პაციენტების საშუალო ასაკი 24 წელი იყო, მაგრამ შემთხვევების თითქმის მეოთხედს 4 წლის და უმცროსი ასაკის ბავშვები შეადგენდნენ.

მეცნიერებმა ასევე გამოავლინეს, რომ ტრავმის ხასიათი მკვეთრად განსხვავდება პაციენტის ასაკის მიხედვით:

18 წლამდე ასაკობრივ ჯგუფში თვალის დაზიანებების 46% ქიმიურ დამწვრობაზე მოდიოდა (მოზრდილებში ეს მაჩვენებელი 1%-ზე ნაკლებია), ხოლო დარეგისტრირებული ქიმიური დამწვრობის 83% ბავშვების კოსმეტიკურ საშუალებებთან შეხებას უკავშირდებოდა – მათ შორის: კანის მოვლის საშუალებები და პარფიუმერია (40%), ფრჩხილის მოვლის პროდუქტები (22%), სპრეები და შამპუნები (22%). 4 წლისა და უმცროსი ასაკის ბავშვებში შემთხვევათა 70% პროდუქტებთან მეთვალყურეობის გარეშე წვდომას უკავშირდებოდა.

ზრდასრულებში თვალის დაზიანებების 56% ჭრილობებზე, სისხლჩაქცევებსა და ზედაპირულ დაზიანებებზე მოდიოდა. შემთხვევების 22%-ს თერმული დამწვრობა შეადგენდა, რაც წყაროში თვალის სითბურ დაზიანებად არის აღწერილი.

კვლევის მთავარი ავტორის, აატიფ საიდის განმარტებით, ეს შედეგები მიუთითებს კოსმეტიკური პროდუქტებისა და თავის მოვლის საშუალებების უსაფრთხო შენახვისა და მოხმარების აუცილებლობაზე. მცირეწლოვნებისთვის ეს ნიშნავს პროდუქტების (განსაკუთრებით სითხეებისა და სპრეების) ბავშვებისთვის მიუწვდომელ ადგილას განთავსებას, ხოლო მოზარდებსა და ზრდასრულებში — თმის ცხელ ინსტრუმენტებთან და პირადი მოვლის საშუალებებთან სიფრთხილის დაცვას.