აშშ-ის სენატის წევრებმა, რენდ პოლმა და რონ ჯონსონმა, 2021 წლის დასაწყისით დათარიღებული ტექსტური შეტყობინებები გამოაქვეყნეს, რომლებიც ენტონი ფაუჩისა და ჯანდაცვის სხვა მაღალჩინოსნების შიდა განხილვებს ასახავს. მიმოწერა, რომელიც COVID-19-ის ვაქცინების (Pfizer და Moderna) ავტორიზაციიდან მალევე შედგა, ორსულებში ვაქცინაციის პოტენციური რისკებისა და სარგებლის შეფასებას ეხება. იმ პერიოდში სპეციალისტები ჯერ კიდევ აგროვებდნენ კლინიკურ მონაცემებს ორსულებზე, რადგან საწყის ეტაპზე დაავადებათა კონტროლისა და პრევენციის ცენტრი (CDC) ვაქცინის გვერდითი მოვლენების მონიტორინგისთვის მხოლოდ სპეციალურ სისტემას, V-safe-ს იყენებდა.
შიდა მიმოწერისას, რომელშიც ფაუჩისთან ერთად ვივეკ მურტი და CDC-ის იმდროინდელი დირექტორი როშელ ვალენსკი მონაწილეობდნენ, სპეციალისტები მსჯელობდნენ, თუ ორსულობის რომელ პერიოდში იყო აცრა უფრო მიზანშეწონილი. ფაუჩის განმარტებით, არ არსებობდა მტკიცებულება იმისა, რომ ორსულობის ადრეულ ან გვიან ეტაპზე აცრას რაიმე უპირატესობა ჰქონდა. მან აღნიშნა, რომ ვაქცინაციის შემდგომმა მაღალმა სიცხემ თეორიულად შესაძლოა პირველ ტრიმესტრში მუცლის მოშლის რისკი გაზარდოს, თუმცა იქვე დასძინა, რომ რეალურ პრაქტიკაში, აცრილ 10 000-ზე მეტ ორსულში უსაფრთხოების პრობლემა არ დაფიქსირებულა, ხოლო უშუალოდ კოვიდით ინფიცირება ორსულისთვის გაცილებით უფრო რეალურ საფრთხეს წარმოადგენდა.
აღნიშნული მიმოწერიდან შვიდი თვის შემდეგ, CDC-იმ ორსულებში COVID-19-ის წინააღმდეგ ვაქცინაციის ოფიციალური რეკომენდაცია გასცა. მილიონზე მეტ ორსულზე ჩატარებულმა კვლევებმა დაადასტურა, რომ ვაქცინაცია არ ზრდის მუცლის მოშლისა თუ ორსულობის სხვა გართულებების რისკს. პირიქით, აცრა მნიშვნელოვნად ამცირებს კორონავირუსით გამოწვეული მძიმე დაავადების განვითარების ალბათობას, რაც რეალურ საფრთხეს წარმოადგენს დედისა და ნაყოფის ჯანმრთელობისთვის. მიუხედავად ამ მტკიცებულებებისა, გასულ წელს ჯანდაცვის დეპარტამენტის ხელმძღვანელმა, რობერტ კენედი უმცროსმა, CDC-ის ეს რეკომენდაცია გააუქმა, თუმცა მეან-გინეკოლოგთა ამერიკული კოლეჯი (ACOG) ორსულებში ვაქცინაციას კვლავ აქტიურად უჭერს მხარს.
ფაუჩის ტელეფონიდან ამოღებული ეს შეტყობინებები იმ 34 000-ზე მეტი ჩანაწერის ნაწილია, რომლებსაც სენატორები პანდემიის მართვის პროცესების შესასწავლად აანალიზებენ. აღნიშნული მასალების გასაჯაროება კიდევ ერთხელ ააქტიურებს წლების განმავლობაში მიმდინარე დავას რესპუბლიკელებსა და ინფექციური დაავადებების ყოფილ მთავარ ექსპერტს შორის. პროცესები განსაკუთრებით მას შემდეგ გამწვავდა, რაც გასულ თვეში სენატის მოსმენაზე ფაუჩიმ კითხვებზე პასუხის გაცემისგან თავის არიდების მიზნით მეხუთე შესწორება გამოიყენა, რასაც კონგრესის უპატივცემულობის ბრალდება მოჰყვა, თუმცა მისი ადვოკატების განცხადებით, ამ კონსტიტუციური უფლების გამოყენებას მყარი იურიდიული საფუძველი ჰქონდა.
წყარო: CBS
