ამერიკელი სენატორი, 71 წლის ლინდსი გრემი მოულოდნელად გარდაიცვალა. მისი ოფისის ინფორმაციით, სიკვდილის მიზეზი აორტის დისექცია გახდა, რომელიც არტერიოსკლეროზულმა კარდიოვასკულურმა დაავადებამ (არტერიების გამაგრებამ) გამოიწვია. სენატორის გარდაცვალებამ კიდევ ერთხელ წამოწია წინ ამ ვერაგი და უეცარი პათოლოგიის თემა, რომელიც წამებში წყვეტს ადამიანის სიცოცხლეს და ჯანდაცვის სისტემისგან ორგანიზებულობას მოითხოვს.
რა არის აორტის დისექცია და ვის ემუქრება იგი
აორტის დისექცია არის მდგომარეობა, როდესაც ორგანიზმის მთავარი არტერიის (აორტის) შიდა კედელი იხევა და სისხლი მის შრეებს შორის იწყებს დენას. ეს იწვევს აორტის სრულ გაგლეჯას ან ორგანოებისთვის სისხლის მიწოდების შეწყვეტას.
მიუხედავად იმისა, რომ არსებობს გარკვეული ხელშემწყობი ფაქტორები, როგორიცაა მაღალი არტერიული წნევა ან სისხლძარღვების დაზიანება, ეს პათოლოგია შეიძლება სრულიად მოულოდნელად განვითარდეს ნებისმიერ ზრდასრულ ადამიანში, რომელიც მანამდე რისკჯგუფში საერთოდ არ მოიაზრებოდა.
როგორ უნდა გაუმკლავდეს სახელმწიფო ჯანდაცვა ამ გამოწვევას
ამ დიაგნოზის დროს გადამწყვეტი მნიშვნელობა ენიჭება დროს. ვინაიდან წამები წყვეტს ყველაფერს, პაციენტის უცხოეთში გადაყვანა ან თუნდაც ქვეყნის შიგნით შორ მანძილზე ტრანსპორტირება პრაქტიკულად შეუძლებელია. ერთადერთი რეალური გამოსავალი ადგილზე ძლიერი კლინიკური ბაზის არსებობაა. პაციენტი დაუყოვნებლივ უნდა მოხვდეს უახლოეს სპეციალიზებულ ცენტრში, სადაც მორიგე კარდიოქირურგებს მსგავსი გადაუდებელი ოპერაციების მართვის მყისიერი გამოცდილება და შესაბამისი აღჭურვილობა აქვთ.
ამ მძიმე გამოწვევასთან გასამკლავებლად, უპირველეს ყოვლისა, საჭიროა ქვეყნის მასშტაბით კარდიოქირურგიული სერვისების სწორი გეოგრაფიული განაწილება, რათა კრიტიკულ მდგომარეობაში მყოფი ადამიანისთვის საჭირო დახმარება გონივრულ დროში ხელმისაწვდომი იყოს.
გარდა ამისა, უდიდესი როლი ენიჭება სასწრაფო დახმარების რგოლს — ეკიპაჟებმა პირველივე წუთებიდანვე ზუსტად უნდა ამოიცნონ სიმპტომები და პაციენტის მარშრუტიზაცია პირდაპირ იმ კლინიკაში მოახდინონ, რომელიც ოპერაციის დაუყოვნებლივ დაწყებას შეძლებს. მხოლოდ ასეთი გამართული და შეთანხმებული მუშაობა მისცემს ადამიანებს გადარჩენის რეალურ შანსს.
წყარო: NBC
