21 ოქტომბრიდან საქართველოს მასშტაბით სეზონური გრიპის საწინააღმდეგო ვაქცინაციის მასშტაბური პროგრამა იწყება. აცრა სახელმწიფოს მიერ სრულად ფინანსდება და ის ქვეყნის ნებისმიერი მოქალაქისთვის უფასოდ იქნება ხელმისაწვდომი.
იმუნიზაციის სახელმწიფო პროგრამის ფარგლებში, საქართველომ 200 000 დოზა ფრანგული წარმოების, სამკომპონენტიანი ვაქცინა (Sanofi Winthrop Industrie-ის მიერ წარმოებული Vaxigrip) უკვე შეიძინა. ეს პრეპარატი ჯანმრთელობის მსოფლიო ორგანიზაციის (WHO) მიერ რეკომენდებულ, მაღალი სანდოობის მქონე ვაქცინების სიაში შედის.
სპეციალისტების განმარტებით, აღნიშნული ვაქცინა ზუსტად იმ სპეციფიკურ შტამებზეა მორგებული, რომელთა ცირკულაცია და ფართო გავრცელებაც მიმდინარე გრიპის სეზონზეა მოსალოდნელი.
მართალია, აცრა სურვილის შემთხვევაში ყველა მოქალაქისთვისაა ხელმისაწვდომი, თუმცა სამედიცინო სფეროს წარმომადგენლები განსაკუთრებულ ყურადღებას მაღალი რისკის ჯგუფებზე ამახვილებენ და მათ დროული იმუნიზაციისკენ მოუწოდებენ.
„განსაკუთრებით მნიშვნელოვანია ვაქცინაცია მაღალი რისკის ჯგუფებისთვის — ქრონიკული დაავადების მქონე პირებისთვის, ონკოპაციენტებისთვის, ორსულებისა და 60 წლისა და უფროსი ასაკის პირებისთვის. ამასთან, რისკ-ჯგუფს წარმოადგენს სამედიცინო პერსონალიც“, — აღნიშნავენ უწყებაში.
გარდა ამისა, ვირუსის გავრცელების სპეციფიკიდან გამომდინარე, პრიორიტეტულ სამიზნე ჯგუფებში შედიან თავშესაფრებისა და პანსიონატების ბენეფიციარები, ასევე იქ დასაქმებული თანამშრომლები.
სეზონური გრიპის საწინააღმდეგო აცრის გაკეთება მოქალაქეებს ქვეყნის მასშტაბით არსებულ იმ სამედიცინო დაწესებულებებსა და პოლიკლინიკებში შეუძლიათ, რომლებიც ვაქცინაციის სერვისის მიმწოდებლებად არიან რეგისტრირებულნი.
სახელმწიფო პროგრამით სარგებლობა და გრიპის ვირუსის წინააღმდეგ იმუნიტეტის გამომუშავება ბავშვებში უკვე 6 თვის ასაკიდანაა ნებადართული და უსაფრთხო.
წყარო: დევნილთა, შრომის, ჯანმრთელობისა და სოციალური დაცვის სამინისტრო
