ციურიხის ფედერალური ტექნოლოგიური ინსტიტუტის (ETH Zurich) მკვლევრებმა ტიპი 2 დიაბეტისა და სიმსუქნის სამკურნალოდ ინოვაციური სამედიცინო იმპლანტი შექმნეს. მცირე ზომის მოწყობილობა სისხლში ზედმეტ შაქარს ელექტრული მუხტის გამოყენებით სრულიად უვნებელ ნივთიერებად გარდაქმნის. ნაშრომი ჟურნალ Science-ში გამოქვეყნდა
სისტემა უწყვეტი გლუკოზის მონიტორთან ერთად მუშაობს და პირდაპირ სმარტფონით იმართება. როცა სისხლში შაქრის დონე იწევს, ტელეფონი იმპლანტს რადიოსიხშირულ ენერგიას უგზავნის. ოქროთი და პლატინით დაფარული ელექტროდები მიზანმიმართულ ქიმიურ რეაქციას რთავენ და გლუკოზას უვნებელ სუბპროდუქტად (გლუკონატად) შლიან. პროცესი შაქრის დონის ნორმალიზებისთანავე ავტომატურად ჩერდება.
ლაბორატორიულ თაგვებზე ჩატარებულმა 6-კვირიანმა ექსპერიმენტმა დაადასტურა, რომ მოწყობილობამ ცხოველების სისხლში შაქრის დონე დაასტაბილურა და ინსულინის მკვეთრი მატება თავიდან აიცილა. პარალელურად, თაგვებმა სხეულის მასის 10% დაკარგეს, რადგან დარეგულირებულმა გლუკოზამ ორგანიზმი ცხიმის წვის რეჟიმში გადაიყვანა.
„სისტემა პაციენტის მეტაბოლურ საჭიროებებს უწყვეტად და ავტონომიურად ერგება. ახლა ჩვენი მთავარი გამოწვევაა დავამტკიცოთ, რომ მოწყობილობა ადამიანის ორგანიზმში შაქრის დიდ მოცულობას უსაფრთხოდ და ეფექტიანად გარდაქმნის“, — აცხადებს კვლევის თანაავტორი, ბიოტექნოლოგიისა და ბიოინჟინერიის პროფესორი მარტინ ფუსენეგერი.
მისივე განმარტებით, ტექნოლოგია ჯანსაღ კვებასა და ფიზიკურ აქტივობას არ ანაცვლებს, თუმცა დიაბეტისა და სიმსუქნის მართვის თერაპიულ არსენალში ის უმძლავრესი ინსტრუმენტი გახდება.
წყარო: LiveScience
