ალცჰაიმერის დაავადების პრევენციის მიმართულებით მეცნიერებმა ახალი, საყურადღებო კანონზომიერება გამოავლინეს. ლომა-ლინდას უნივერსიტეტის მკვლევართა ჯგუფის თანახმად, 65 წელს ზემოთ ასაკის პირებში კვერცხის რეგულარული მიღება ალცჰაიმერის განვითარების რისკს მნიშვნელოვნად ამცირებს. კერძოდ, კვირაში მინიმუმ ხუთი დღის განმავლობაში, დღეში თითო კვერცხის ჩართვა რაციონში დაავადების განვითარების ალბათობას 27%-ით ამცირებს.
ჟურნალ Journal of Nutrition-ში გამოქვეყნებული კვლევა 15 წელზე მეტი ხნის განმავლობაში 40,000-მდე სუბიექტის მონაცემებს აანალიზებდა. მეცნიერებმა მკაფიო ტენდენცია აღმოაჩინეს, რომლის მიხედვითაც ალცჰაიმერის რისკი კვერცხის მოხმარების სიხშირის პროპორციულად მცირდება.
მონაცემების მიხედვით, მათთან შედარებით, ვინც კვერცხს საერთოდ არ იღებს, თვეში 1-დან 3-მდე კვერცხის მიღება რისკს 17%-ით ამცირებს, კვირაში 2-დან 4-მდე მოხმარებისას რისკი 20%-ით იკლებს, ხოლო კვირაში 5 ან მეტი კვერცხის მიღების შემთხვევაში ეს მაჩვენებელი 27%-მდე ადის. აღსანიშნავია, რომ მეცნიერებმა აღრიცხეს როგორც პირდაპირ მირთმეული, ისე სხვადასხვა მზა პროდუქტსა თუ ცომეულში შემავალი „ფარული“ კვერცხის მოხმარებაც.
კვლევის ავტორების თქმით, კვერცხი ტვინის ჯანმრთელობისთვის კრიტიკულად მნიშვნელოვანი ნუტრიენტების უნიკალური წყაროა. ის შეიცავს ქოლინს, რომელიც მეხსიერებასა და სინაფსურ ფუნქციონირებაში გადამწყვეტ როლს თამაშობს, ასევე ლუტეინსა და ზეაქსანტინს – სპეციფიკურ კაროტინოიდებს, რომლებიც გროვდება ტვინის ქსოვილში, კოგნიტურ მაჩვენებლებს აუმჯობესებს და საგრძნობლად ამცირებს ოქსიდაციურ სტრესს. გარდა ამისა, კვერცხის გული განსაკუთრებით მდიდარია ფოსფოლიპიდებითა და ომეგა-3-ით, რაც აუცილებელია ნეიროტრანსმიტერების რეცეპტორების გამართული მუშაობისთვის.
მიუხედავად კვლევის პოზიტიური შედეგებისა, მეცნიერები საზოგადოებას ახსენებენ, რომ კვერცხის მოხმარება მხოლოდ საერთო, დაბალანსებული დიეტის ნაწილი უნდა იყოს. ტვინის ჯანმრთელობისა და ალცჰაიმერის პრევენციისთვის გადამწყვეტია ჯანსაღი კვების კომპლექსური მოდელის დაცვა და არა მხოლოდ ერთი კონკრეტული პროდუქტის იმედზე ყოფნა.
ცნობისთვის: აღნიშნული კვლევის ნაწილობრივი დამფინანსებელია ამერიკის კვერცხის საბჭო, ხოლო მონაცემთა ბაზის შექმნა აშშ-ის ჯანმრთელობის ეროვნულმა ინსტიტუტმა უზრუნველყო.
წყარო: Eurakalert
