ოჰაიოს შტატის უნივერსიტეტის სამედიცინო ცენტრის მკვლევარებმა დაადგინეს, რომ მოკლევადიანი, ვირტუალური ინტერვენციები მოზარდებში სუიციდური აზრების შემცირებისა და პრევენციისთვის განსაკუთრებით ეფექტურია. კვლევა, რომელიც ჟურნალ Behavior Therapy-ში გამოქვეყნდა, ხაზს უსვამს, რომ ციფრული ფორმატი თინეიჯერებისთვის უფრო მისაღებია, ვიდრე ტრადიციული, პირისპირ შეხვედრები.
მიუხედავად იმისა, რომ სუიციდი მოზარდებში სიკვდილიანობის ერთ-ერთი წამყვანი მიზეზია, დღესდღეისობით მოწყლადი თინეიჯერების დიდი ნაწილი დროულ ფსიქოლოგიურ დახმარებას არ ან უბრალოდ ვერ იღებს. ძირითად ბარიერებად სახელდება:
- სტიგმა ფსიქიკური ჯანმრთელობის გარშემო;
- შეზღუდული წვდომა სერვისებზე;
- შიში, რომ დახმარების ძიება ავტომატურად გამოიწვევს მშობლების ან მეურვეების ჩართულობას.
კვლევაში 14-დან 18 წლამდე ასაკის 51 მოზარდი მონაწილეობდა, რომლებსაც ბოლო პერიოდში სუიციდური აზრები აწუხებდათ. ისინი შემთხვევითობის პრინციპით სამ ჯგუფად დაყვეს:
- კრიზისული რეაგირების დაგეგმვა (CRP) ჩატის მეშვეობით;
- CRP პირისპირ შეხვედრისას;
- ვირტუალური, დამოუკიდებელი უსაფრთხოების დაგეგმვა (საკონტროლო ჯგუფი).
შედეგებმა აჩვენა, რომ, ფორმატის მიუხედავად, ინტერვენციიდან ორი კვირის შემდეგ, მონაწილეთა თითქმის 40%-ს სუიციდური აზრები აღარ აღენიშნებოდა. თუმცა, საინტერესოა ის ფაქტი, რომ მოზარდები ყველაზე მეტად კმაყოფილები ჩატზე დაფუძნებული ვერსიით დარჩნენ. მათთვის ეს ფორმატი უფრო მარტივი გამოსაყენებელი აღმოჩნდა.
აშშ-ის დაავადებათა კონტროლისა და პრევენციის ცენტრის (CDC) მონაცემებით, საშუალო სკოლის მოსწავლეების თითქმის 10%-ს აქვს სუიციდის მცდელობა, ხოლო 22%-ს ამაზე უფიქრია.
წყარო: sciencedirect
