ვაშინგტონის უნივერსიტეტის მედიცინის სკოლის მეცნიერებმა, დოქტორ სუმანთ პრაბჰუსა და დოქტორ მოჰამედ ამინ ისმაჰილის ხელმძღვანელობით, დაადგინეს, რომ ელენთა მიოკარდიუმის ინფარქტის შემდეგ გულის შეხორცების პროცესში გადამწყვეტ როლს თამაშობს. ამ აღმოჩენას შეუძლია მომავალში ახალი თერაპიული სტრატეგიები შემოგვთავაზოს, რომლებიც გულის უკმარისობის პრევენციისთვის ელენთის აქამდე უცნობ შესაძლებლობებს გამოიყენებს.
კვლევის დეტალები:
მიოკარდიუმის ინფარქტის დროს გულის ქსოვილი ზიანდება და ნაწიბურდება, რაც მის ფუნქციას ასუსტებს. მკვლევრებმა ელენთაში არსებული იმუნური უჯრედების სპეციალური ჯგუფი, მარგინალური მეტალოფილური მაკროფაგები (MMMs) + (CD169+Tim4) – შეისწავლეს. თაგვებზე ჩატარებულმა კვლევამ აჩვენა, რომ ეს უჯრედები ელენთიდან გულის დაზიანებულ ნაწილში მიემართებიან, რათა მკვდარი უჯრედები გაასუფთაონ, ანთება შეამცირონ და შეხორცების პროცესი დააჩქარონ.
კვლევის შედეგებს კლინიკური პოტენციალი აქვს. გულის შეტევის მქონე პაციენტების სისხლში ამ მაკროფაგების მომატებული რაოდენობა დადასტურდა, რაც მიუთითებს იმაზე, რომ ელენთასა და გულს შორის კავშირი ადამიანებშიც არსებობს.
გულის შეხორცების პროცესისთვის აუცილებელია, რომ ანთება იყოს კონტროლირებადი და დაზიანებული უჯრედები დროულად მოშორდეს. უკონტროლო ანთება გულის კუნთს სერიოზულად აზიანებს, რაც იწვევს მის რემოდელირებას და, საბოლოოდ, გულის უკმარისობას.
მეცნიერებმა დაადგინეს, რომ ელენთის მაკროფაგებს შეუძლიათ მავნე იმუნური პასუხის ჩახშობა და გულის შეხორცების პროცესის სტიმულირება. ამ უჯრედების ან ელენთის გარეშე, თაგვების მდგომარეობა საგრძნობლად გაუარესდა, რამაც მათში სიკვდილიანობის მაჩვენებელი და გულის კედლის დაზიანების ხარისხი გაზარდა.
ამ აღმოჩენებმა ელენთა და მისი სპეციალიზებული მაკროფაგები ახალ თერაპიულ სამიზნეებად აქცია. თუ ექიმები MMMs-ის რაოდენობასა და აქტივობას გაზრდიან (ექსპერიმენტული პრეპარატების საშუალებით), მათ შეეძლებათ გულის კუნთის შეხორცება გააუმჯობესონ, გართულებები შეამცირონ და გადარჩენის მაჩვენებელი გაზარდონ. ეს მიდგომა განსხვავდება ტრადიციული მეთოდებისგან, რადგან აქცენტი იმუნურ რეგულაციასა და ქსოვილების აღდგენაზე კეთდება.
მკვლევრები გეგმავენ, უფრო დეტალურად შეისწავლონ, თუ როგორ შეიძლება ელენთა-გულის იმუნური კავშირით კლინიკური მანიპულირება. პრეპარატები, რომლებიც სასარგებლო MMMs-ს აძლიერებენ (მაგალითად, LXRα აგონისტები), პერსპექტიულად გამოიყურება ცხოველებზე ჩატარებულ კვლევებში, თუმცა მათი უსაფრთხოება და ეფექტურობა ადამიანებზეც უნდა შემოწმდეს.
ეს აღმოჩენა აფართოებს ჩვენს ცოდნას კარდიო-ელენთის ღერძის შესახებ და გზას უხსნის ინოვაციურ იმუნოთერაპიებს, რომლებმაც შეიძლება რევოლუცია მოახდინონ მიოკარდიუმის ინფარქტის შემდგომ მკურნალობაში.
წყარო: AHA/ASA Journals
