90 წლის ასაკში გარდაიცვალა გამოჩენილი ამერიკელი იმუნოლოგი და მიკრობიოლოგი ჯ. მაიკლ ბიშოპი (J. Michael Bishop). მისი რევოლუციური აღმოჩენები სიმსივნური უჯრედების ბუნების შესახებ თანამედროვე ონკოლოგიის საფუძვლად იქცა.
ჯ. მაიკლ ბიშოპმა ჰაროლდ ვარმუსთან ერთად 1989 წელს ფიზიოლოგიასა და მედიცინაში ნობელის პრემია დაიმსახურა. მათმა კვლევამ რადიკალურად შეცვალა მეცნიერების წარმოდგენა იმაზე, თუ როგორ წარმოიქმნება სიმსივნე.
ბიშოპის რევოლუციური აღმოჩენა: „ონკოგენები“
ბიშოპამდე მეცნიერების დიდ ნაწილს სჯეროდა, რომ სიმსივნეს მხოლოდ გარედან შემოჭრილი ვირუსები იწვევდა. თუმცა, ბიშოპმა და ვარმუსმა დაამტკიცეს, რომ სიმსივნის გამომწვევი გენები (ონკოგენები) სინამდვილეში ჩვენივე ნორმალური უჯრედების შემადგენელი ნაწილია.
მათ აღმოაჩინეს, რომ გარკვეულ პირობებში (მაგალითად, მუტაციის დროს), ჩვენივე ჯანსაღი გენები შესაძლოა „გაბოროტდნენ“ და უჯრედების უკონტროლო დაყოფა გამოიწვიონ. ამ აღმოჩენამ გზა გაუხსნა სიმსივნის მიზნობრივ (სამიზნე) თერაპიას და დიაგნოსტიკის თანამედროვე მეთოდებს.
აკადემიური მოღვაწეობა
ჯ. მაიკლ ბიშოპი ათწლეულების განმავლობაში მოღვაწეობდა კალიფორნიის უნივერსიტეტში (UCSF), სადაც ის 10 წლის განმავლობაში კანცლერის პოზიციასაც იკავებდა. კოლეგები მას ახასიათებენ, როგორც ბრწყინვალე მენტორს, მწერალს და მეცნიერების პოპულარიზატორს.
„მაიკლ ბიშოპმა იმედი მისცა მილიონობით ადამიანს, რომ სიმსივნის დამარცხება შესაძლებელია მისი გენეტიკური ბუნების შესწავლით,“ — ნათქვამია სამეცნიერო საზოგადოების სამძიმრის წერილებში.
წყარო: The New-York Times
