კრეატინი ჯანმრთელობისთვის ნამდვილად უსაფრთხოა?

კრეატინი სპორტსმენებისა და ბოდიბილდერების ერთ-ერთ ყველაზე საყვარელ საკვებ დანამატად რჩება, თუმცა მისი უსაფრთხოების შესახებ დისკუსია კვლავ აქტუალურია. ბოლო დროინდელი კვლევები და ექსპერტების განმარტებები აჩვენებს, რომ ზომიერი დოზებით კრეატინის მიღება ჯანმრთელი ადამიანებისთვის ზოგადად უსაფრთხოა, თუმცა არსებობს გარკვეული რისკები და გამონაკლისები, რომლებიც გასათვალისწინებელია.

კრეატინი არის ამინომჟავა, რომელიც ბუნებრივად გამომუშავდება თირკმელებში, ღვიძლსა და პანკრეასში, შემდეგ კი კუნთებში ინახება ენერგიისა და ძალის უზრუნველსაყოფად. გარდა ორგანიზმის მიერ გამომუშავებული რაოდენობისა, კრეატინის მარაგის დაახლოებით ნახევარს ადამიანი საკვებიდან, ძირითადად წითელი ხორციდან და ზღვის პროდუქტებიდან იღებს. მეიოს კლინიკის დიეტოლოგის, ტარა შმიდტის განმარტებით, კრეატინის დანამატები განსაკუთრებით სასარგებლოა ვეგანებისა და ვეგეტარიანელებისთვის, რომლებიც ცხოველურ ცილას შეზღუდულად მოიხმარენ.

მიუხედავად გავრცელებული მითებისა, თითქოს კრეატინი ჯანმრთელობისთვის საშიშია, მეცნიერულად დადასტურებულია, რომ დღიური მცირე ან საშუალო დოზების მიღება უსაფრთხოა. კუნთოვანი მასის ზრდის გარდა, ის დადებითად მოქმედებს ძვლების, ტვინისა და გულის ჯანმრთელობაზე, ასევე ეხმარება ისეთ ნეიროკუნთოვან დაავადებებთან ბრძოლას, როგორიცაა, მაგალითად, გაფანტული სკლეროზი და კუნთოვანი დისტროფია.

თუმცა, მაღალი დოზების ხანგრძლივმა მოხმარებამ შესაძლოა გამოიწვიოს წყლის შეკავება ორგანიზმში, თავბრუსხვევა, გულისრევა და ჭარბი ოფლიანობა. ადამიანებმა, რომლებსაც უკვე აქვთ თირკმლის დაავადებები, სიფრთხილე უნდა გამოიჩინონ, რადგან კრეატინმა შესაძლოა მდგომარეობა გააუარესოს. გარდა ამისა, ექსპერტები ურჩევენ ორსულებს, მეძუძურ დედებს და ღვიძლის დაავადებების მქონე პირებს, თავი შეიკავონ დანამატის მიღებისგან, რადგან ამ ჯგუფებზე კვლევების საკმარისი რაოდენობა არ არსებობს.