ჟურნალ Aging Clinical and Experimental Research-ში გამოქვეყნებული ახალი სამეცნიერო ნაშრომი გრიპის ყოველწლიურ ვაქცინაციას განიხილავს, როგორც ხელმისაწვდომ სტრატეგიას ხანდაზმულებში დემენციის პრევენციისთვის. მეცნიერთა ჯგუფი ამტკიცებს, რომ სეზონური აცრა ტვინის სისხლძარღვოვან და უჯრედულ ჯანმრთელობას იცავს.
ოთხი მასშტაბური ეპიდემიოლოგიური კვლევის ანალიზმა გრიპის საწინააღმდეგო იმუნიზაციასა და დემენციის შემცირებულ რისკს შორის პირდაპირი კავშირი დაადგინა. კერძოდ, 2 მილიონზე მეტი ზრდასრულის მონაცემებზე დაყრდნობით ჩატარებულმა მეტა-ანალიზმა აჩვენა, რომ ვაქცინირებულ პირებში დაავადების განვითარების ალბათობა 31%-ით დაბალია.
აშშ-ის ვეტერანთა საქმეების დეპარტამენტისა და UK Biobank-ის მონაცემები კი მიუთითებს, რომ ეს დამცავი ეფექტი დოზაზეა დამოკიდებული. რაც უფრო სისტემატურად იტარებს პირი ვაქცინაციას წლების განმავლობაში, მით უფრო ძლიერია კოგნიტური რეზერვი. აღსანიშნავია, რომ ყველაზე მკვეთრი, 42%-იანი კლება სისხლძარღვოვანი დემენციის შემთხვევაში დაფიქსირდა.
ვაქცინაციის ნეიროპროტექტორული ეფექტი რამდენიმე ფაქტორით აიხსნება. გრიპი არ არის მხოლოდ რესპირატორული დაავადება. ის სისტემური ინფექციაა, რომელიც იწვევს მწვავე ანთებას და სისხლის შედედების პრობლემებს, რაც ინფიცირებიდან პირველივე დღეებში მკვეთრად ზრდის ინფარქტისა და ინსულტის რისკს.
ანთებითი პროცესების მინიმიზაციითა და სისხლძარღვოვანი ინციდენტების პრევენციით, ვაქცინაცია ტვინს კუმულაციური დაზიანებისგან იცავს. მკვლევრები აღნიშნავენ, რომ მედიცინაში გრიპის ვაქცინის როლი ხშირად სათანადოდ არ არის გააზრებული. ვაქცინაციის ინტეგრირება დემენციის პრევენციის სქემაში ერთ-ერთი ყველაზე ეფექტური და დაბალბიუჯეტიანი სტრატეგია შეიძლება გახდეს.
წყარო: Sage Journals
