მისურის უნივერსიტეტის (University of Missouri) მეცნიერებმა გამოავლინეს მარტივი და ეფექტური ჩვევა, რომელიც ცხოვრების ხარისხს მნიშვნელოვნად აუმჯობესებს. სამეცნიერო ჟურნალ Journal of Behavioral Medicine-ში გამოქვეყნებული ახალი კვლევის თანახმად, სტაბილური დღის რეჟიმის შენარჩუნება ამცირებს ფიზიკურ ტკივილს და ამსუბუქებს დეპრესიის სიმპტომებს.
კვლევამ აჩვენა, რომ ყოველდღიური განრიგის სიმტკიცეს განსაკუთრებული მნიშვნელობა აქვს უფროსი ასაკის ადამიანებისთვის, რომლებსაც უძილობა (ინსომნია) აწუხებთ. მკვლევართა თქმით, მიუხედავად ძილის ხარისხისა, ის პირები, რომლებიც მუდმივად იცავდნენ დღის რეჟიმს, ნაკლებად უჩიოდნენ ფიზიკურ ტკივილსა და დეპრესიას, ვიდრე ისინი, ვისაც მოუწესრიგებელი განრიგი ჰქონდათ.
მეცნიერების განმარტებით, დილით ერთსა და იმავე დროს გაღვიძება, კვება, მუშაობა თუ დაძინება ეხმარება ორგანიზმს შინაგანი ბიოლოგიური საათის — ცირკადული რიტმის სინქრონიზაციაში. ცირკადული რიტმი არეგულირებს ძილს, გუნება-განწყობასა და სხვა მნიშვნელოვან ბიოლოგიურ ფუნქციებს.
მეცნიერები ხაზს უსვამენ, რომ რეჟიმის მცირე დარღვევამაც კი, მაგალითად, შაბათ-კვირას განსხვავებულ დროს გაღვიძებამ და დაძინებამ (რასაც ხშირად „სოციალურ ჯეტლაგს“ უწოდებენ), შესაძლოა ბიოლოგიური საათი არიოს. მკვლევართა დასკვნით, კვირის განმავლობაში მყარი ყოველდღიური რუტინის შენარჩუნება უზრუნველყოფს ორგანიზმის გამართულ ფუნქციონირებას და ხანგრძლივ პერსპექტივაში ჯანმრთელობის საერთო მდგომარეობას აუმჯობესებს.
წყარო: Springer
