სოციალურ წრეებში დამკვიდრებული აზრი, რომ დღეში ერთი ან ორი ჭიქა სასმელი ჯანმრთელობისთვის უსაფრთხოა, ახალმა მასშტაბურმა სამეცნიერო კვლევამ სრულად გააბათილა. ჟურნალ Journal of Studies on Alcohol and Drugs-ში გამოქვეყნებული მონაცემებით, ალკოჰოლის ე.წ. „ზომიერი“ მოხმარებაც კი პირდაპირ კავშირშია ნაადრევი სიკვდილის, ინვალიდობისა და ისეთი ქრონიკული დაავადებების რისკთან, როგორიცაა, მაგალითად, ონკოლოგიური და გულის პათოლოგიები.
ამერიკელი და კანადელი მეცნიერების ჯგუფმა 7 200-ზე მეტი სამეცნიერო სტატია და ეროვნული მონაცემები გააანალიზა. აღმოჩნდა, რომ მათთვის, ვინც კვირაში საშუალოდ 14 ჭიქას (დღეში 2 ჭიქას) მოიხმარს, ალკოჰოლით გამოწვეული სიკვდილიანობის რისკი 1-ია 25-დან. კვირაში 7 ჭიქამდე (დღეში მაქსიმუმ 1 ჭიქა) მიღება კი ჯანმრთელობისთვის მხოლოდ მინიმალურ რისკებს შეიცავს.
ნაშრომი განსაკუთრებით უსვამს ხაზს იმ ფაქტს, რომ ალკოჰოლს რეალურად არანაირი დამცავ-პროფილაქტიკური ეფექტი არ გააჩნია. მართალია, მცირე დოზამ შეიძლება ოდნავ შეამციროს იშემიური ინსულტის რისკი, თუმცა, როდესაც მეცნიერებმა საერთო სურათი შეაფასეს, ეს მცირე სარგებელი სრულად გადაწონა სხვადასხვა სახის სიმსივნეების (საყლაპავის, პირის ღრუს, მკერდის კიბო) განვითარების მაღალმა საფრთხემ.
აღსანიშნავია, რომ ეს კვლევა აშშ-ის მთავრობის დაკვეთით მომზადდა, რათა საფუძვლად დადებოდა ამერიკის ახალ დიეტურ გაიდლაინებს. თუმცა, ექსპერტების თქმით, ოფიციალური რეკომენდაციების შემუშავებისას ეს ზუსტი ციფრები გვერდზე გადადეს და დოკუმენტში მხოლოდ ბუნდოვანი ფრაზა, „რაც ნაკლები, მით უკეთესი“, დატოვეს. მეცნიერები მიიჩნევენ, რომ კონკრეტული ზღვრის ცოდნა აუცილებელია, რათა ადამიანებმა საკუთარ ჯანმრთელობაზე გაცნობიერებული გადაწყვეტილებები მიიღონ.
წყარო: MedicalXpress
