ანემიის მქონე დედების ახალშობილებს ტვინის მოცულობა უმცირდებათ. მეცნიერების დაკვირვებით, ეს ცვლილება მოძრაობასთან, სწავლასა და ემოციების რეგულირებასთან დაკავშირებულ საკვანძო რეგიონებს აზიანებს.
ლონდონის სამეფო კოლეჯისა და კეიპტაუნის უნივერსიტეტის მკვლევართა გუნდმა 300-ზე მეტ დედასა და მათ ჩვილზე დაკვირვება აწარმოა. ბავშვების ტვინის სკანირება სამი თვიდან ორ წლამდე პერიოდში რამდენჯერმე განხორციელდა. მონაცემები აჩვენებს, რომ ანემიის მქონე დედების შვილების ტვინის საერთო მოცულობა 4%-ით იკლებს. მეცნიერები ხაზს უსვამენ, რომ ორსულებში ანემიის მსუბუქი ფორმაც კი ჩვილზე ნეგატიურ ეფექტს ტოვებს.
უშუალო ცვლილებები ტვინის სამ კონკრეტულ უბანში — პუტამენში, კუდიან ბირთვსა და კორძიან სხეულში ვლინდება. კვლევის მთავარი ავტორი, ჯესიკა რინგშოუ განმარტავს, რომ დროთა განმავლობაში ბავშვებს შორის სხვაობა მხოლოდ იზრდება და ეს დეფიციტი უკვალოდ არასდროს ქრება. მისი თქმით, ტვინის განვითარებაში დაფიქსირებული ჩამორჩენა სკოლის ასაკში უკვე შესამჩნევ კოგნიტიურ სირთულეებში ითარგმნება.
დღესდღეობით ანემია, რომელიც ძირითადად რკინის დეფიციტს უკავშირდება, მსოფლიოში ორსულთა მესამედზე მეტს უტევს. შესაბამისად, გლობალური ჯანდაცვის ექსპერტები ორსულობის პერიოდში რკინისა და ანემიის სკრინინგის აუცილებლობას კიდევ ერთხელ ითხოვენ.
კვლევისას მეცნიერებმა სრულიად ახალი, პორტატიული MRI სკანერები გამოიყენეს და შედეგები ჟურნალ Brain Communications-ში გამოაქვეყნეს. პროფესორ სტივ უილიამსის განცხადებით, ეს ინოვაციური ტექნოლოგია სპეციალისტებს საშუალებას აძლევს, განვითარებად ტვინზე არასრულფასოვანი კვების გავლენა პირდაპირ რთულ გეოგრაფიულ გარემოშიც კი უზუსტესად გაზომონ.
წყარო: The Guardian
