76 წლის კენ თეობოლდს 2018 წელს სისხლის კიბოს აგრესიული ფორმა, მრავლობითი მიელომა დაუდგინეს. ექიმებმა მას უთხრეს, რომ მაქსიმუმ ორი წელი იცოცხლებდა, მაგრამ ინოვაციურ კლინიკურ კვლევაში ჩართვამ კენს სიცოცხლე გაუხანგრძლივა. რვა წლის შემდეგ ის თავს შესანიშნავად გრძნობს და თავისუფალ დროს შვილიშვილებთან ატარებს.
კვლევას ლონდონის კიბოს კვლევის ინსტიტუტი (ICR) ხელმძღვანელობდა და გრძელვადიანი შედეგები ჟურნალ Lancet Oncology-ში გამოქვეყნდა. მონაცემები აჩვენებს, რომ ექვსი წლის შემდეგ ექსპერიმენტული ჯგუფის პაციენტთა 70% გადარჩა. სტანდარტული თერაპიის პირობებში ეს მაჩვენებელი მხოლოდ 40%-ს აღწევს. ამასთან, ახალი მეთოდით ნამკურნალები მონაწილეების 54%-ს დაავადების პროგრესირება საერთოდ არ აღენიშნება.
ინოვაციური მიდგომა ჯანდაცვის სისტემაში უკვე ცნობილი ხუთი მედიკამენტის (დარატუმუმაბი, ციკლოფოსფამიდი, ბორტეზომიბი, ლენალიდომიდი და დექსამეტაზონი) სრულიად განსხვავებული სქემით გამოყენებას გულისხმობს. ტრადიციული პრაქტიკისგან განსხვავებით, სპეციალისტებმა პაციენტებს საწყის ეტაპზევე უმკაცრესი, ინტენსიური თერაპია და ღეროვანი უჯრედების ტრანსპლანტაცია დაუნიშნეს, შემდეგ კი ეს კომბინირებული მკურნალობა დაავადების სრულ კონტროლამდე შეუფერხებლად გააგრძელეს.
მეცნიერებმა 107 მაღალი რისკის ჯგუფში მყოფ პაციენტს აღნიშნული მკურნალობა უშუალოდ დაავადების მოლეკულური ბიოლოგიის მიხედვით შეურჩიეს. ინტენსიური საწყისი ფაზის დასრულების შემდეგ სპეციალისტებს პაციენტები შემანარჩუნებელ თერაპიაზე გადაჰყავთ. შესაბამისად, კენ თეობოლდი ამჟამად ხუთის ნაცვლად მხოლოდ ორ მედიკამენტს იღებს და სრულფასოვანი ცხოვრებით ტკბება.
კვლევის ხელმძღვანელი, პროფესორი მარტინ კაიზერი განმარტავს, რომ მიელომა მედიცინას მუდმივად ურთულეს გამოწვევას უქმნიდა, რადგან ტრადიციული მეთოდების მიუხედავად, დაავადება პაციენტებში სწრაფად ბრუნდებოდა. მკვლევრის შეფასებით, მიღებული შედეგები პერსონალიზებული მიდგომის უდიდეს ძალას ადასტურებს: “როდესაც მკურნალობას დაავადების ბიოლოგიას ვარგებთ, პაციენტების სიცოცხლის მნიშვნელოვნად გახანგრძლივებას ვახერხებთ”.
მეცნიერებმა სპეციალური გენური ტესტირება, “MMProfiler SKY92” გამოიყენეს, რომელმაც მაღალი რისკის მქონე პაციენტები ზუსტად გამოავლინა. ამჟამად მარეგულირებელი ორგანოები ჯანდაცვის სისტემაში ამ ტესტის ფართოდ დანერგვის საკითხს განიხილავენ. ეს მიდგომა ექიმებს შანსს აძლევს, აგრესიული კიბო დროულად ამოიცნონ და პაციენტებს საწყისი ეტაპიდანვე პერსონალიზებული მკურნალობა დაუნიშნონ.
წყარო: independent.co.uk
