კალიფორნიის უნივერსიტეტის დევისის (UC Davis) რადიოლოგიის დეპარტამენტმა ჯანდაცვის ეროვნული ინსტიტუტისგან (NIH) $2.5 მილიონის ოდენობის ფედერალური გრანტი მიიღო. ეს ოთხწლიანი დაფინანსება, რომელიც NIH-ის ბიოსამედიცინო გამოსახულების და ბიოინჟინერიის ეროვნულ ინსტიტუტს ეკუთვნის, უპრეცენდენტო ჰიბრიდული გამოსახულების ტექნიკის შემუშავებას მოხმარდება. ამ ინოვაციას შეუძლია რადიკალურად შეცვალოს კიბოს, ძვლის დაავადებებისა და გულის პრობლემების დიაგნოსტიკა.
ტექნოლოგიური ინოვაცია გულისხმობს ორი მძლავრი სამედიცინო ვიზუალიზაციის მეთოდის სინთეზს: პოზიტრონულ-ემისიური ტომოგრაფიისა (PET) და ორმაგი ენერგიის კომპიუტერული ტომოგრაფიის (Dual-Energy CT). აღნიშნული კომბინაცია აქამდე უპრეცენდენტოა კლინიკურ პრაქტიკაში.
PET სკანირება უზრუნველყოფს ფუნქციური და მოლეკულური ინფორმაციის მიღებას, კერძოდ, კონცენტრირდება იმ უბნებზე, სადაც უჯრედული მეტაბოლური აქტივობა მომატებულია (მაგალითად, ავთვისებიანი სიმსივნის დროს).
კომპიუტერული ტომოგრაფია (CT) არის ანატომიური გამოსახულების მიღების მეთოდი, რომელიც ორგანიზმის შინაგანი სტრუქტურების დეტალურ, მაღალი გარჩევადობის ვიზუალიზაციას უზრუნველყოფს.
ტრადიციულ ჰიბრიდულ PET/CT სისტემებში, კომპიუტერული ტომოგრაფია ფუნქციონირებს მხოლოდ ერთ ენერგეტიკულ დონეზე (ერთ ძაბვაზე). ეს ზღუდავს მის შესაძლებლობას, განასხვავოს ერთმანეთისგან სხვადასხვა ქსოვილი მათი ატომური შემადგენლობისა და რენტგენის სხივების შესუსტების კოეფიციენტის მიხედვით. ეს შეზღუდვა ამცირებს ქსოვილის შემადგენლობის ზუსტად იდენტიფიცირების (მაგ., ცხიმის, წყლის, კალციუმის) შესაძლებლობას.
ეს ახალი მეთოდი, რომელსაც PET-ით გაძლიერებული ორმაგი ენერგიის CT ჰქვია, ჭკვიანურად იყენებს PET სკანირების (უჯრედული აქტივობის საზომი) მონაცემებს. ამ მონაცემების საფუძველზე კომპიუტერი ხელოვნურად ქმნის მეორე, მაღალი ენერგიის CT გამოსახულებას.
შემდეგ, ეს ხელოვნურად შექმნილი გამოსახულება ერთიანდება სტანდარტული CT სკანირების მონაცემებთან. შედეგად ვიღებთ ორმაგი ენერგიის ვიზუალიზაციას, რომელიც ბევრად უფრო მეტ ინფორმაციას იძლევა ქსოვილის შემადგენლობის შესახებ.
ეს მიდგომა კლინიცისტებს აწვდის ქსოვილის შემადგენლობის შესახებ უფრო ზუსტ და რაოდენობრივ ინფორმაციას (მაგალითად, მასალების სეპარაცია), რაც მიიღწევა დამატებითი მაიონიზებელი რადიაციის ზემოქმედებისა და არსებული PET/CT სკანერების აპარატურული მოდიფიკაციის საჭიროების გარეშე.
ახალ გამოსახულების ტექნიკას აქვს პოტენციალი, რომ:
- გააუმჯობესოს ონკოლოგიური გამოსახულება ჯანმრთელი და სიმსივნური ქსოვილების უფრო ზუსტი გარჩევით.
- გააძლიეროს ძვლის ტვინის სკანირება დაავადების აქტივობის უფრო ზუსტი გაზომვის შესაძლებლობით.
- უზრუნველყოს ახალი ტიპის ვიზუალიზაცია ძვლის, ძვლის ტვინის, ანთებითი პროცესებისა და გულ-სისხლძარღვთა რისკს შორის არსებული პათოფიზიოლოგიური კავშირის შესახებ.
ვინაიდან PET-ით გაძლიერებული ორმაგი ენერგიის CT შეიძლება დაინერგოს არსებულ PET/CT სკანერებზე ძვირადღირებული აპარატურის განახლების გარეშე, მას შეუძლია მოწინავე ჰიბრიდული გამოსახულება უფრო ხელმისაწვდომი გახადოს სამედიცინო დაწესებულებებისთვის.
ტექნოლოგიის წარმატებით დანერგვის შემთხვავში, მას შეუძლია გამოიწვიოს მნიშვნელოვანი კლინიკური შედეგები დაავადებათა დიაგნოსტიკასა და მონიტორინგში, მათ შორის ონკოლოგიურ და სხვა პათოლოგიებში. კერძოდ, ერთიანი ჰიბრიდული სკანირება უზრუნველყოფს უფრო მაღალი კონტრასტულობის, უფრო ზუსტ და ყოვლისმომცველ ვიზუალიზაციას, რაც გააუმჯობესებს ექიმების მიერ მიღებულ დიაგნოსტიკურ გადაწყვეტილებებს.
წყარო: ucdavis
