27 მარტს, თბილისის სახელმწიფო უნივერსიტეტში გაიმართება საერთაშორისო სამეცნიერო სიმპოზიუმი: „ტრანსლაციური ნეირომეცნიერება – ლაბორატორიიდან კლინიკამდე“. ღონისძიება გამოჩენილი ქართველი მეცნიერის, აკადემიკოს ვაჟა ოკუჯავას ხსოვნას ეძღვნება.
სიმპოზიუმი თსუ-ის პირველ კორპუსში (115-ე აუდიტორია) ჩატარდება და მასში მონაწილეობას მიიღებენ წამყვანი სპეციალისტები შვედეთიდან, ავსტრიიდან, დიდი ბრიტანეთიდან და შვეიცარიიდან. სამუშაო ენა ინგლისურია.
ღონისძიების პროგრამა
ღონისძიებას თსუ-ის რექტორი, აკადემიკოსი ჯაბა სამუშია, მეცნიერებათა ეროვნული აკადემიის პრეზიდენტი როინ მეტრეველი და ჯანდაცვის მინისტრი მიხეილ სარჯველაძე გახსნიან. შესავალ ნაწილში პროფესორი მიხეილ ოკუჯავა ისაუბრებს ვაჟა ოკუჯავას ცხოვრებასა და მის უდიდეს წვლილზე მეცნიერებაში.
სამეცნიერო სესიების ფარგლებში მსოფლიო დონის მეცნიერები წარმოადგენენ მოხსენებებს ნეირომეცნიერების აქტუალურ საკითხებზე:
-
ღეროვანი უჯრედები და გენური თერაპია: პროფესორები მერაბ კოკაია, ზაალ კოკაია (ლუნდის უნივერსიტეტი) და მეთიუ უოკერი (UCL) ისაუბრებენ ეპილეფსიის მკურნალობის თანამედროვე მეთოდებსა და ნეირონული კავშირების აღდგენის გზებზე.
-
ბავშვთა ნევროლოგია: პროფესორი ჰელენ კროსი (UCL) მიმოიხილავს წინსვლას ბავშვთა ასაკის ეპილეფსიების მართვაში.
-
კოგნიცია და გარემო: შვეიცარიელი პროფესორი ჰენრიკ იოკაიტი ყურადღებას გაამახვილებს სოციალურ კოგნიციასა და გარემოს აღქმაზე ეპილეფსიის დროს.
სიმპოზიუმის ორგანიზატორები არიან პროფესორები დიმიტრი კორძაია, მერაბ კოკაია და ოკუჯავების ოჯახის წევრები. ღონისძიება მნიშვნელოვანი პლატფორმაა ქართველი და უცხოელი მეცნიერებისთვის გამოცდილების გასაზიარებლად და ლაბორატორიული მიღწევების პრაქტიკაში დასანერგად.
